TURA: Garo Hills-ni a·kawe jolrango ita so·gipa karkanarangko chalaienggipa manderang, buring bolgrimrango donggipa bol wa·arangko skatang den·e jakkalenga ine A·chik Progessive Approach (APA) Western Zone Phulbari parakatenba, iani bidingo Garo Hills Autonomous District Council (GHADC)-ni Chief Forest Officer-na badi ka·doataha.
GHADC-ni Chief Forest Officer-na sedoatgipa chittio APA Western Zone Phulbari-ni president Jack A Sangma-ni parakatani gitade, ia karkanarango itarangko so·na gita karkanao kam ka·enggipa manderang, Phulbari jolrango donggipa buring bolgrimrangoniko bol damberangkoba den·e ra·angenga aro ian buring bolgrimrangko porongrong ong·roroatani gita ong·engachim.
Buring bolgrimrango donggipa bol wa·a damberangkoba skatang den·engani a·sel ian samtangtango ong·telaigiparangna nangchakeaniko ra·baasan ong·aigija buring bolgrimrango donggipa do·o mat aro matburingrangnaba nangchakeaniko ra·baani gita ong·enga ine APA Western Zone Phulbari-ni president parakataha.
“Buring bolgrimrango donggipa bol wa·arangko skatang den·e galaigenchimode aro iarangko champenganirang dongjagenchimode mikkangchi chaktogija ding·anirang batroroangan baksana chirangkoba man·na gita neng·ani ong·gnok,” ine Sangma parakataha.
Iani bidingo ta·raken nirok sandianirangko dakchina aro bolrangko den·na gita skatang permit-rangko on·jachina gitaba APA, GHADC-ni Chief Forest Officer-ko didiataha.
