SHILLONG: Meghalaya a·dokni United Democratic Party (UDP) aro Bharatiya Janata Party (BJP) dolrangba, a·dokni saksa senior IPS officer Idashisha Nongrang-ko a·dokni gital Director General of Police (DGP) songchina nangniktokenga.
Iani bidingo kobor ra·timgipa manderang baksa agangrikengon, a·doktangni police officer-ko DGP songgenchimode uan a·dok gimiknan mikkim rasongni ong·gen ine UDP-ni working president Titosstarwell Chyne parakataha.
Meghalaya a·doko Donald Philips Wahlang-ko Chief Secretary songe Khasi mandeko songahani gimin DGP-naba Khasi IPS me·chik officer-ko songgenchimode a·doko skanggipa changna a·doktangni manderangko officer-na songani ong·gnok ineba ua aganaha.
“NPP-chi dilenggipa MDA-ni bak ong·paengani gimin Nongrang-ko gital DGP songchina chinga a·dok sorkariko didigen. Chingni cabinet minister-rangko iani bidingo agangrikchina chinga didigen,” ine Chyne aganaha.
Apsan daken BJP dolba, Tribal me·chik officer-ko gital DGP songchina sorkariko didiataha.
Meghalaya a·dokni gital DGP-na UPSC, sakgittam IPS officer-rangni bimingko minge on·manahani gimin Nongrang-ko DGP songchina gita BJP-ni dilgiparang, a·dokni Chief Minister Conrad K Sangma-ko gronge agangrikna tik ka·angaha.
“DGP-ni kamna Nongrang-an krabatgipa IPS officer ong·enga maina UPSC-ni minge on·gipa officer sakgittamoni uan brebatgipa ong·a aro Meghalaya Police baksaba bang·en kamrangko ka·e nikmanaha,” ine BJP-ni state spokesperson aro kamoni neng·takgimin IPS officer saksa Mariahom Kharkrang aganaha.
Meghalaya a·dokni da·o ong·enggipa DGP Lajja Ram Bishnoi, May-ni 19 tarikon kamtangoni neng·takangengahani gimin uni biapko ra·rikna gita UPSC, sakgittam IPS officer, chong·motan 1992 batch-ni Idashisha Nongrang, 1993 batch-ni Ram Prasad Meena aro 1994 batch-ni Deepak Kumar-ko minge on·angahachim.
