SHILLONG: Bi·sarangko drae til·ekani aro uandake ong·gija dake kal·akaoniko champengna man·na gita Sombar salo, University of Science & Technology Meghalaya (USTM)-ni ning·o donggipa University School of Law & Research (USLR)-ni gita awareness program-ko Ri Bhoi College-o ong·atangaha.
A·gilsak gimikon bi·sarangko kragija dake kal·akanirang batroroengani gimin manderangna mikrakatanirangko on·na miksonganio ia awareness program-ko ong·atangaha.
Tom·ani a·bachengao, USLR-ni Assistant Professor Marphy Chetia, program-o bak ra·giparangna rimchaksoani kattarangko aganangaha aro ia tom·anio, Ri Bhoi College-ni Principal Dr EC Benny-ba jinmana aganprakangaha.
Ia program-ko ong·atanio USLR-ni chatro chatrirang, POCSO Act 2012-ni bidingo jinmana aganprakangengon, ia POCSO Act-ni miksongani aro ia niamrangko ra·gatanichi maikai bi·sarangko ong·gija dakgipa kamrangoni chel·chakna man·achim, uarangni giminba agan-talate on·angaha.
Ia tom·anio Shillong-ni Additional SP Orville Isaac Massar-ba POCSO Act 2012-ni bidingon talate on·angenba, maikai FIR, Zero FIR-ko ka·na nanga, uarangni gimin talate on·angenba, ia Act-ni ning·o dongimin dingtang dingtang niamrangni gimin talate on·angjolaha.
Chatro chatrirangna mikrakataniko on·na gita dingtangmancha ia tom·anio video-koba mesokangaha aro kragija dake kal·akaniko man·on sano badi ka·na nanga uarangni giminba talate on·angaha.
Bon·kamao USLR-ni chatro Victor Sulein, mittelpilani kattarangko agane, ia program-ko matchotataha.
