TURA: Mongolbar walni 8:00 bajimango, South West Garo Hills a·jani dingtang dingtang NGO-rang, chong·motan ACHIK, FKJGP, FAF, APA aro ASPF dolrang, niam gri salangenggipa bolrangko Kuligaon songo rim·na man·aha.
Ia bolrangko ML-08C 0401 Mahindra Bolero Pik-up gario salangengachim indiba kosako janapatgimin NGO-rang, niam gri bol salenggiparangko nirikkiengmiting somoio ia gari baksana bolrangko rim·na man·aha.
Ja·mano ia gari aro bolrangko NGO-rang, South West Garo Hills a·jani Mahendraganj Forest Range Office-na pakwate on·ataha.
Da·ororo Garo Hills-ni bolrangko niam gri ratenba gipin biaprangona palsrukanirang batroroengani a·sel buring bolgrimrang porongrong ong·roroangengahani gimin NGO-rang, iandake niam gri bol badinggiparangko champengna mikrakbee nirok sandianirangko daktokengachim.
