SHILLONG: Re·anggipa Budbar salo, Common University Entrance Test (CUET) porikkako NEHU Shillong campus-o ra·anio porikkako segipa chatro chatrirang aro kam ka·giparangba neng·nikanirangko chagrongna nangtokahani gimin porikkako ra·piltaichina, ong·jaode a·dokko CUET porikkaoniko watsrangchina a·dok sorkari, National Testing Agency (NTA)-ko didina tik ka·angaha.
“Chatro chatrirang bang·batan CUET porikkako name sena man·tokjaha aro songadam nokadamrangode bang·a chatro chatrirangan porikkako sena register ka·rikna man·jaha. A·doko CUET porikkako ra·na tarisamsoanirang chu·ongjaha, uni gimin chinga Meghalaya a·dokko CUET-oniko watchina NTA-ko mol·molgen. Chatro chatrirangna gnigipa cholko on·na nangchongmota aro chinga iani bidingo NTA-na seatgen,” ine a·dokni Education Minister Rakkam A Sangma parakataha.
Education Minister-ni parakatani gitade, a·doko CUET porikkako ra·ani bidingo a·dok sorkari, NTA-ni coordinator-rang aro NEHU-ni official-rang baksa Bristibar salo tom·e chanchirimangaha.
“CUET porikkako ra·aniode a·dok sorkari maming bak dongja aro iako NTA-sa chu·gimik jako ra·a. Meghalaya a·doko CUET porikkako ong·atna NTA-ni tarisamsoanirang chu·ongjaha aro uamang a·dok sorkari baksaba agangrikjaha,” ine Sangma matnangataha.
NEHU centre-o CUET porikkako ja·manchake sena nangahani gimin talataniko on·angengon, “Ia centre-o sak 40-50-ni pal sak ritcha batpile porikkako sena nangaha aro biometric-ko ra·giparangara saksnisan ong·e ja·manchakna gita nangaha. NTA-ni aganatani ja·mansa uamang porikkako sena a·bachengataha,” ine Education Minister parakataha.
Sangma-ni parakatani gitade, NEHU centre-o sak 2000-mangni gita chatro chatrirang CUET porikkako segen ine skang aganatani ja·man May-ni 14 tarik walosa NTA-ni official-rang, ia centre-o sak 4000-mangni gita chatro chatrirang CUET porikkako sena siengani gimin tarisona nanggen ine NEHU-na u·iatahachim.
“Indita somoi bakkandikao maikai NEHU-ni official-rang kamrangko ka·srapkugen?” ine Sangma sing·doataha.
