SHILLONG: Meghalaya a·dokni medical college damgni, chong·motan Shillong medical college aro Tura medical college-ko kulianio dingtang dingtang neng·nikanirangko chagrongna nangkuengon, medical college damdokko kulina ma·mong sorkarini dakchake on·gipa Uttar Pradesh a·dokona kamrangko ma·sie ra·na gita a·dokni Health Minister Ampareen Lyngdoh re·angna sienga.
Sukrobar salo, Shillong aro Tura Medical College & Hospital-rangko rikani bidingo tom·e chanchirimani ja·man kobor ra·timgipa manderang baksa agangrikengon, Uttar Pradesh a·doko damdok medical college-rangko chalaina ma·mong sorkari dakchake on·aha aro iani bidingo ma·sie ra·na gita ua Uttar Pradesh a·dokona bakan re·angenga ine Lyngdoh parakataha.
Tura medical college-ko rikani kamrang ka·sine matchotangenga ine janapatengon, Tura medical college-ko 2026-27 bilsini gisepo chalaina ka·dongsoenga ine Health Minister parakataha.
Lyngdoh-ni aganani gitade, ia medical college-rangko kulina kamrangko ka·engon, kamna kragipa doctor-rangko rimna man·na gita doctor-rangna service rule-rangkoba tarina nangenga aro ma·mong sorkario skigipa aro skigipani kamko ka·gijagipa doctor-rangnaba model-rang donga.
Kamo gisik nangenggipa doctor-rangna expression of interest (EOI)-koba sorkari on·na nanggen ine janapatskaengon, kamoni neng·take skigipani kamko ka·na man·gipa doctor-rangba bang·en dongani gimin sorkari, military doctor-rangonikoba kamna sandienga ine Health Minister parakataha.
Tura medical college-ara jillaoni aditan chel·ani gimin ia college-ko kulichakatanio adita neng·nikanirangko chagrongnaba gnang ine janapatengon, re·a doani cholrangkoba sorkari nienga aro iani bidingo Vellore CMC-ni bewalrangko nienga ine Lyngdoh parakataha.
