College-rango admission ra·na CUET sena nanganikoba jegalata
SHILLONG: University aro college-rango admission ra·na gita Common University Entrance Test (CUET) sena nanganiko dingtang dingtang dolrang jegalatenba, Meghalaya a·dokko CUET-oniko chu·gimik watsrangchina gita dabiangtokaha.
Iani bidingo Hynniewtrep Integrated Territorial Organisation (HITO) Students Wing-ni gita a·dokni Chief Minister Conrad K Sangma-na sedoatengon, adita salrangna skang NEHU Shillong campus-o CUET porikkako ra·anio porikkako segipa chatro chatrirang neng·nikanirangko chagrongna nangtokahani gimin suk ong·gijaniko parakatenba, Meghalaya a·dokni chatro chatrirangko ia CUET porikkaoniko chu·gimik watsrangchina aro college-rango admission ra·na CUET sena nanganikoba ra·galchina didiataha.
“Meghalaya a·dokode CUET-ko sena gita cholrangan chu·ongkujaengani a·sel chatro chatrirang, mongsongbate songadam nokadamrango poraipagipa chatro chatrirangde neng·nikanirangko chagrongna nangtokenga. Songadam nokadamrangode da·o dipet CUET centre damsaba dongkujaengani gimin chatro chatrirang gimikan jillarangonasa re·bae porikkako sena nangtokenga indiba kangal cholgri ong·pagipa chatro chatrirangde songre songabatnamangba tangka paisarang dongpaja,” ine HITO Students Wing-ni dilgiparang, Chief Minister-na sedoatgipa chittio parakataha.
HITO-ni parakatani gitade, CUET porikkaoniko watchina gita uamang a·dokni gitcham Education Minister Lahkmen Rymbui baksa agangrikon, a·dokni chatro chatrirangkode CUET-oniko watgen aro college-rango admission ra·na gita chatro chatrirang CUET-ko sena nangjawa ine ua ku·rachakaniko on·ahachim.
Indake ong·engon, North East Indigenous People’s Forum (NEIPF) Meghalaya unit-ba, Meghalaya a·dokkode CUET-oniko watchina gita National Testing Agency (NTA)-o dabiangskaaha.
Meghalaya a·doko, mongsongbate Shillong songjinmani CUET centre damsao CUET-ko seanio chatro chatrirang neng·nikanirangko chagrongna nangtokaha ine janapatenba NEIPF-ni dilgiparang, Meghalaya a·dokko CUET-oniko watna gita ma·mong sorkari aro NTA baksa agangrikchina a·dok sorkarikoba didiataha.
NEIPF-ni parakatani gitade, ia bilsio Meghalaya a·dokni bang·a chatro chatrirangan CUET porikkako serikpana chol ong·jaha aro ia chatro chatrirangnade ian noksan ong·ani ong·engaha.
A·doko bang·bata college-rangan admission form-rangko on·na a·bachengsotokahani gimin bang·bata chatro chatrirangan admission ra·na gita CUET-ko pass ka·na nanggen ine ma·sitokjaha ineba NEIPF parakataha.