TURA: Selsella jolrango Jal Jeevan Mission (JJM)-ni mitam kamrang matchotkujaenga aro mitamranga matchotahaoba chirangko man·tokjaenga ine kamrangko ta·raken niatchina gita Selsella jolni ASWA, FKJGP, GSU aro ADE dolrang, a·dokni PHE Minister Marcuise N Marak-na sedoataha.
“Songantion namgipa ringani chirangko on·na kamko ka·engani gimin chinga Meghalaya sorkariko mittlpilna ska indiba Selsella jolrango mitam songrangode pipe-rangko salmanahaoba chirangko man·tokskakujaenga,” ine NGO-rang parakataha.
Ia NGO-rangni parakatani gitade, Selsella jolrango donggipa Amguri, Mandagre, Singgimary, Apalgre, Wakantagre, Nengkalpara, Chondra, Ramjong, Kudaldua, Abima, Singwilgre, Sarbila aro uandakgipa songrango da·onan chirangko man·tokkujaengachim.
“Mitam biaprangode JJM-ni kamrang matchotkujaenga aro mitam biaprangode kamrang matchotaha ine report-rangko on·ahaoba songni manderang chirangkon man·skakujaenga. Ian JJM-ni miksongani gita ong·jaenga aro songni manderang neng·nikanirangko chagrongna nangtokkuenga,” ine Selsella jolni NGO-rang parakataha.
Indake ong·engon, ia jolrango songdongenggipa manderang chu·onga gita chirangko man·pana, kosako janapatgimin songrango ka·gipa JJM-ni kamrangko niatchina, matchotgija dongenggipa kamrangko ta·rakatchina, kamrang matchotahaoba nokdangrangna chirangko sokatchina aro banoba chirangko sokatanio neng·nikanirangko chagrongna nangenga ong·ode ta·raken am·sandianirangko dakchina gita ia NGO-rang, a·dokni PHE Minister-ko didiataha.