Indoor Sports Hall-ko ta·rake nokdonggae on·china NGO-rang dabia
TURA: 2009 bilsio rika matchotgipa Selsella Indoor Sports Hall-ko da·alona kingkingan jakkalgija galchipe donenga ine Selsella-ni FKJGP, GSU, ADE aro ASWA dolrang suk ong·gijaniko parakatenba, ia Indoor Sports Hall-ko chadamberangni namgnina ta·raken nokdonggae on·china a·dokni Sports Minister Shakliar Warjri-ko didiataha.
Iani bidingo a·dokni Sports Minister-na sedoatengon, “Selsella-o Indoor Sports Hall-ko rikaniara chadamberangna kal·susaanirangko namdapatna aro an·tangtangko an·seng baljoke rakkina gita namgipa cholko on·ani gita ong·ahachim indiba ia Indoor Sports Hall-ko da·alona kingkingan nokdonggagija donchipengani a·sel maming namgnirangko man·jaengaha,” ine Selsella-ni NGO-rang parakataha.
Ia Indoor Sports Hall-ko chalaianichi chadamberangni kal·susaanirangko namdapatna aro be·en bimangrangko an·seng baljoke rakkina namgipa cholrang ong·gen ine janapatengon, ian chadamberangna dingtang dingtang kal·susaanirangko nambate skie on·na aro dingtang dingtang gadangrango bak ra·pana gita cholrangko on·ani ong·gen ine Selsella-ni dolbri NGO-rang parakataha.
“Uni gimin ia cholko ra·e chinga ia Indoor Sports Hall-ko ta·raken nokdonggae on·china aro ia sports hall-ko chalaichina a·dokni Sports Minister-ko mol·molenga. Ia Indoor Sports Hall-ko nokdonggae on·anichi ian ia mongsonggipa nokko chadamberangna kulie on·anisan ong·aigija songadam nokadamrango namroro silroroaniko ra·bana sorkarini kam ka·aniko mesokaniba ong·gen,” ine Selsella-ni NGO-rang, Sports Minister-na seatgipa chittio parakataha.