TURA: North Garo Hills a·jani Adokgre songo, RMSA skulna gital rikgipa nok, adita jarangni gisepon nosto ong·pilaha aro skul noko be·srianirangko nikna man·engaha ine jolo songdongenggipa manderang parakataha.
Koborko on·ani gitade, ia skul nokko rika matchotani ja·man a·dokni Education Department-na pakwate on·angahachim indiba skul nokko pakwate on·angaoni adita jarangni gisepon ia skul nokni pakmarango bretanirangko aro a·arango cement-rangni gil·gaoanirangkosa nikna man·skaahachim.
Iani bidingo Garo Students Union (GSU) Adokgre regional unit, jolo songdongenggipa manderang baksa North Garo Hills a·jani Deputy Commissioner-na badi ka·e sedoataha aro ia skul nokko rikani bidingo ta·raken sandirokanirangko dakatchina didiataha.
GSU Adokgre regional unit-ni deputy commissioner-na badi ka·doangani gitade, ia skul nokko gong crore batpile koros ong·e rikahachim indiba adita salrangna skang uamang, jolni gipin dolrang baksa ia skul nokko re·ange nion, ia skul nokni nosto ong·na a·bachengakosa uamang nikna man·aiahachim.
Ia skul nokko rikanio badiaba biaprangode cement-rangko chu·onggija on·esa a·arangko reppiaiahani a·sel ta·raken bretna a·bachengengaha ine GSU Adokgre regional unit-ni dilgiparang parakataha.
“Ia skul nokko rikani niam gita ong·jahani a·sel da·o ia skul nok nosto ong·na a·bachengengaha. A·arangko reppianio cement-rangkon chu·onga gita on·jaha aro pakmarangba be·srina a·bachengengaha. Ia skul nokko rikgipa contractor aro department, maikai iandake skul nokrangko rikaha, ian skulo poraienggipa bi·sarangna kenchakna nangani ong·jawama?” ine Adokgre songni mande saksa sing·doataha.
Indake ong·engon, iani bidingo GSU aro gipin dolrang, North Garo Hills a·jani Deputy Commissioner-ko grongenba, iani bidingo sandirokchina aro nanga gita ja·kurangko de·china didiangaha.
Ia RMSA skulko 2013 bilsio kuliahachim aro ia skulna gital nokko rikna adita bilsirangna skangsan tangka paisarangko chame on·ahachim.
Adokgre skul nokko rikaoni adita jani gisepon nosto ong·pila ine matnangtoka
Date:
Share post:
