SWGH-o mikka balmindurina mikrakatsoaniko on·a

Ampati: 2024 bilsini May 27 aro 28 tariko Bay of Bengal Coast-oni mikka balmin-duri sokbana am·gipani bidingo nipilaniko dakanio Assam aro Meghalaya a·dokrangni bang·bata biaprango mikkarang jimpretangna mikrakataniko on·angaha aro balwa taraka km 40-50 ba 60-rangona sokna chanchichipsoenga, ine South West Garo Hills Ampati Deputy Commissioner, Hema Nayak, pilak nangchapgipa authority-rangna mikrake donganiko u·iatsoaha.
Department-ni pilak dilgiaprang uamangni Head Quaters-o dongchina aro  nangchongmotgipa nal-jokataniko ra·china Deputy Commissioner ge·etaniko on·aha. South West Garo Hills-ni C&RD Block gimikni Block Development officer-rangna uamangni a·jani gisepo Block Disaster Management Committee-rang aro Villager Disaster Management Committee-rangko kam ka·dilna ge·etaniko on·dapangaha.
Disaster Management Committee-na naljokani ja·kurangko de·angna aro simsaksoanirangko dakani bidingo nangchongmot-gipa ge·etaniko on·china Block gadango tanggitik-gipa tom·aniko dakchina ku·pattiaha, balminduri-o jedakgipa a·selrangko niroke kamrangko ka·angna man·a ge·etaniko on·aha.
Pilak center-rango tanggitik nangaona first aid-ni bosturangko tarisamsoe dona aro medicine-rangko kraa gita chimonge dona PHC-rang ba CHC-rangni pilak Rapid Response Team (RRTs)-rang tarie dongchina District Medical aro Health Officer-rangko Deputy Commissioner ge·etaniko on·dapangaha.
Jedakgipa neng·nika-nirangona chu·onga gita cha·anirangko rakkina man·a pilak nanggipa cha·-anirangko sualgiparangna Deputy Director of Food and Civil Supply ge·eta-niko on·a.  +91 93660 26244 +91 94023 05902 +91 89746 27076 tanggitik nang-chongmotaona  janapat-gipa number-rangona man-derang EOC Help Desk-ko contact ka·na man·gen.
Nangchongmotgipa pilak simsakanirangko ra·-china Nayak manderangko didiangaha. South West Garo Hills-ni Snagkarigre biaprango bilakgipa balwarang balanganichi mikka stil ga·akanirang a·bachengaha.