SHILLONG: June 4 tariko, Lok Sabha election-ni vote-rangko chane parakatani salo Section 144 CrPC-ko district administration-ni ra·gatataniara namjabataona sokatgen ine Opposition Congress matnange aganaha.
“Sec 144 crpc-ko altue ra·gatatani miksonganide maiba golmalrang ong·na chanchisoenga. Indiba ian administration-ni dal·a gualani ong·a” ine Meghalaya Pradesh Congress Committee, Secretary, Manuel Badwar aganaha.
“Beben, election-o saoba chegen, saoba sirikgen, chegiparang kusi ong·e manigen, indiba uamangni kusi ong·e maniengon, uamang golmal ka·gen inede ong·jaenga,” ua aganaha.
Administration-ni gitade namgija obostarangona sokanggen inede chanchiatna ba niatna nangani kattaan dongja ine aganengon, “ Ia mingsa ong·gija chanchiani ong·a aro election-o chegiparangko kusi ong·na champenganide ong·an ong·ja aro a·songni democracy-o ian nangchongmotgipa ong·a,” ua aganaha.
“Bebegita uamang kusi ong·e manianiora 144 CrPC-ko ra·gatna maia draataha, ian administration-ni ong·gija chanchianirangko mesoka,” ua agandapaha.
Ia ra·gatgimin niamko Congress-ba ra·galako nangnikengama ine singon, “Anga chanchia ian administration-ni raiosa pangchaka. Iako ra·galpilna nanga inede chinga aganjaenga indiba administration-ba uko ma·sina nanga” ine Badwar aganchakaha.
