TURA: Bay of Bengal-o ‘Remal’ balminduri balengani a·sel Meghalaya a·dokoba mikka balwarang ta·rakengani gimin aro Mongolbar salona kingking mikka baksana balwarang ta·rakgen ine Indian Meterological Department-oni mikrakataniko on·ahani gimin Mongolbar salo, Garo Hills-ni pilak skul aro college-rangkon chipe donchina gita sorkari ge·etaniko on·ataha.
Mikka balwa ta·rakanichi skulrango poraienggipa bi·sarangna aro skigiparangnaba maming kenchakna nanganirang dongjana gita skul aro college-rangko salsana chipe donchina sorkari ge·etaniko on·ataha.
Ia salni bako, sorkari skulrang, private skulrang, sorkarini dakchake on·enggipa institute-rang pilakkon chipe donchina gita sorkari u·iataha.
Indake ong·engon, a·jatangtangni district official-rang obostarangko name nirokanggen aro nangani kri u·iatanirangko on·anggen ine sorkari u·iataha.