SHILLONG: Da·o ong·enggipa MLA sakgniko man·chape Meghalaya a·dokni gimik sakdok MLA-rangni kosako kachario case-rang dongkuenga.
Re·anggipa 2023 bilsini November 9 tariko Supreme Court-ni ge·etanio pangchake ia sakdok MLA-rangni case-rangko Meghalaya High Court jako ra·angkuna tik ka·aha.
Ia sakdok MLA-rangni kosako East Khasi Hills a·jao criminal case-rang bangki dongkuenga ine re·anggipa May-ni 23 tariko Meghalaya High Court parakataha.
Ia sakdok MLA-rangoni gitcham MLA Bindo M Lanong-ni case-ko Judicial Magistrate First Class-ni kachario bichal ka·enga aro ia case-ko 2013 bilsini February 21 tariko mokordoma ka·ahachim.
1951-ni Representation of People’s Act-ni Section 126-ni ning·o Lanong-ni kosako mokordoma ka·aha aro charge sheet-ko 2014 bilsini April 20 tariko file ka·enba, 2021 bilsini November 17 tariko uko dosi chanahachim.
A·dokni sakgipin gitcham MLA Deborah C Marak-ni case-ba Chief Judicial Magistrate-ni kachario bangki dongkuenga aro uni kosako Indian Penal Code-ni Section 120B, 171F aro 506-ni ning·o 2013 bilsini February 16 tariko mokordoma ka·ahachim. Bichal ka·anio uko dosi ine changenchimode ia case-na uko bilsisnina pattoko donani ong·gen.
A·dokni Health Minister Ampareen Lyngdoh-ni kosakoba Shillong-o donggipa Special Judge (CBI)-ni kachario case dongkuenga aro uni kosako IPC-ni Sections 120B, 420, 467, 468, 471, aro 201 baksana Section 13(2) aro Section 13(1)(d)-ni ning·o 2020 bilsini June 25 tariko mokordoma ka·ahachim. Lyngdoh-ni case-o dongimin sastiara bilsi 10-na pattoko donani ong·skaengachim.
A·dokni sakgipin gitcham MLA Mohendro Rapsang-ni kosakoba Judicial Magistrate First Class-ni kachario bangki case dongkuenga aro uni kosako Sections 427, 447, 506, aro 34-ni ning·o 2022-23 bilsirango mokordoma ka·skaahachim. Uni case-ba bilsi gittamna pattoko donani case ong·enga.
Indake ong·engon, West Jaintia Hills a·jaoba gitcham MLA Julius Kitbok Dorphang-ni kosako Jowai-ni Special Judge-ni kachario bangki case dongkuenga. Dorphang-ni kosako POCSO Act-ni Section 5(c)(I)-ni ning·o 2016 bilsini December 24 tariko mokordoma ka·skaahachim. Uni case-ode janggi tanga gimik pattoko donani ba siani sastiko on·anian ong·skaengachim.
A·dokni sakgipin MLA Sanjay A Sangma-ni case-ba West Garo Hills a·jani Tura-o donggipa Special Judge-ni kachario bangki dongkuenga aro uni kosako PC Act-ni Section 12 aro 13-ni ning·o 2023 bilsini August 2 tariko mokordoma ka·skaaha. Ia case-ode bilsisnina pattoko donani ong·enga.