SHILLONG: Meghalaya a·dokni government aro government aided college-rang pilakkon Captain Williamson Sangma State University-ni ning·o ong·atna sorkarini tik ka·aniko Khasi aro Jaintia Hills a·jani dingtang dingtang dolrang jegalatskaaha.
Sorkari college-rang pilakkon State University-ni ning·o ong·atna sorkarini tik ka·aniko jegalatengon, ia ja·kuko de·na skang sorkari, dingtang dingtang college-rang aro a·doko songdongenggipa manderang baksa agangrikchengahama ine Khasi Students Union (KSU) sing·doataha.
Iandake a·dok sorkarini ja·ku de·na miksonganiko jegalatengon, 2005 bilsio MBOSE-ni regional administrative office-ko Shillong-ona apjitangchina dabianio a·sel ong·gipani bidingo KSU gisik ra·atpiltaianiko on·angaha.
KSU-ni parakatani gitade, a·doko donggipa college-rangoni 70 percent-an Khasi-Jaintia Hills a·jaosa ong·ani gimin ia college-rangko a·dokni gipin jolo donggipa state university-o bak ong·ataniara melijaengachim.
Apsan daken Jaintia Students Union (JSU)-ba a·dokni college-rangko Captain Williamson Sangma State University-ni ning·o ong·atna sorkarini tik ka·aniko jegalatenba, ia ja·kuko de·na skang dingtang dingtang college-rang baksa agangrikchengchina sorkariko didiataha.
“College-rangko ia state university-ni ning·o ong·draatna nangja. Chinga State university-ko jegalenga ong·ja indiba ia university-ara da·osa atchidaldal gita ong·engani gimin university-ko chalaianio neng·nikanirangko man·kunaba gnang,” ine JSU parakataha.
Meghalaya a·dok gimiko donggipa dam 74 college-rangoni dam 55-de Khasi-Jaintia Hills a·jarangon ong·ani gimin college-rang gimikkon ia State University-ni ning·o bak ong·ataniara ia jolrango donggipa college-rangna neng·nikani ong·gen ineba JSU-ni dilgiparang parakataha.
Indake ong·engon, Khun Hynniewtrep National Awakening Movement (KHNAM) dolba iandake government college aro government aided college-rangko Capt Williamson Sangma State University-ni ning·o ong·atdrana sorkarini jotton ka·aniko raken jegalataha.
Iako a·dokni Chief Minister Conrad Sangma an·tangsa tik ka·aiahama ma Cabinet-ni ning·o chanchirimchengesa ia ja·kuko de·na tik ka·aha ineba KHNAM-ni working president Thomas Passah sing·doataha.
