TURA: Meghalaya a·dokni State Reservation Policy (SRP)-ko gital dake nipiltaina a·dok sorkari expert committee-ko songahani gimin ia reservation policy-ko taridapgija 1972 bilsioni ja·rikbaenga gitan apsan niamko ja·rikangkuchina Garo Hills-ni dingtang dingtang dolrang dabiangtokaha.
Iani bidingo New Tura Development Forum (NTDF)-ni gita expert committee-na sedoatengon, a·dokni Reservation Policy-ko taridapgija 1972 bilsio Meghalaya a·dokko man·chengani somoio gitcham dilgiparangni suala gitan Garorangna 40%, Khasi-Jaintia-rangna 40% aro gipin jatrangna 20%-kon ja·rikangkuchina didiataha.
“Da·o dongenggipa Reservation Policy-ko taridapjachina chinga nangnikenga maina Meghalaya a·dokko man·chengdilgipa pagitchamrangan, Khasi-Jaintia aro Garorangni janggi tangani gadangko ma·sisoe ia niamko tariangaha,” ine NTDF-ni general secretary LC Momin, State Reservation Policy-ni Expert Committee-na sedoatgipa chittio parakataha.
Ia Reservation Policy-ko mande jelbra jelsuanio pangchake ba biapni kri tarijaha ine janapatengon, Khasi-Jaintia-rang baksa tosusagenchimode ua somoio A·chikrang namen ja·manchakbatani giminsa a·doko mongsonggipa jatgittamna apsan bak rengsiko tikatna gita ia niamko pagitchamrang tariaha ine NTDF parakataha.
Apsan daken, Niksamso Garo Community Organisation (NGCO)-ba a·dokni Reservation Policy-ko taridapjachina didiataha aro 1972 bilsio A·chikrangna tikatgimin 40 percent-kon da·ona kingking chu·gimik man·pakujaenga ine parakataha.
“Meghalaya a·doko songdongenggipa jatgittam, chong·motan Khasi-Jaintia aro Garorangni gisepo Garorangan chol ong·batgijagipa aro ja·manchakbatgipa jat ong·a ine nikesa a·dokko man·e on·dilgipa pagitchamrang 1972 bilsini State Reservation Policy-o Garorangna 40%, Khasi-Jaintiarangna 40% aro gipinrangna 20 percent-ko chame on·ahachim indiba ia bak rengsionikon A·chikrang da·alona kingkingba chu·gimikko man·kujaengani gimin chinga Reservation Policy-ko gital dake taripilaniko raken jegala aro batesa A·chikrangni gimaatgipa bak rengsiko chu·gimik on·china chinga dabienga,” ine NGCO-ni president TR Marak parakataha.
Indake ong·engon, Reservation Policy-ko gital dake nipiltaiani bidingo Tura-o donggipa Chisim Mahari Association-ba chanchirimangaha aro ia policy-ko taridapjachina association-ni pilak membor-rangan nangniktokaha.
“Meghalaya a·dokni bilsi 50 gapaniona kingkingan A·chikrang an·tangtangna chamgimin 40 percent quota-ko chu·gimik man·kujaenga aro A·chikrang pilakni gitan ja·manchakkuenga. Uni gimin da·o dipet State Reservation Policy-ko taridapna nanganiko chinga nikja indiba 1972 bilsio tarigimin apsan niamkon kakket aro bebeo ja·rikchinasa chinga nangnikenga,” ine Tura-ni Chisim Mahari Association parakataha.
