TURA: Meghalaya a·dokni State Reservation Policy-ko gital dake nipiltaianio, dingtang dingtang dolrangni aro a·doko songdongenggipa manderangni nangnikani aro chanchianirangkoba sorkarini songe on·gipa expert committee ra·engani gimin ia 1972 bilsini State Reservation Policy-ko skango gitan donaichina aro taridapjachina gita Garo Reservation Policy Coordination Committee (GRPCC), expert committee-na ku·pattianiko on·ataha.
Iani bidingo GRPCC, adita salrangna skang Garo Hills gimikni All Garo Mahari Association, Senior Citizens aro dingtang dingtang dolrang baksa tom·aniko ong·atangenba, 1972 bilsini State Reservation Policy-kon ja·rikangkuchina aro ia Reservation Policy-ko taridapjachina gita expert committee-ko ku·pattiatna tik ka·e donangaha ine u·iataha.
Manderangni janggi tangani gadang, lekka porani gadang, sorkario kam ka·ani gadang aro pilakni gitan A·chikrang ja·manchakkuengani gimin State Reservation Policy-ko taridapgija skango gitan apsan niamko ja·rikangkuna nanga ineba GRPCC, Expert Committee-na sedoataha.
Meghalaya a·dok bilsi 50 gappilahaoba da·alonan A·chikrangna state reservation policy-ni mongsonggipa miksonganikon chu·sokatkujaenga ineba GRPCC-ni dilgiparang parakataha.
“Meghalaya a·dokni bilsi 50 gapanio A·chikrang an·tangtangna chamgimin bak rengsiko da·onan chu·gimik man·kujaenga. Uni gimin a·dokni Reservation Policy-ko taridapgija skanggipa A·chikrangni man·na nangkuenggipa bak rengsirangkon tikatchengna nangenga,” ine GRPCC-ni dilgiparang, Expert Committee-na sedoatgipa chittio parakataha.