Independent Inquiry-ko dakchina dabitoka
TURA: Tura-o PA Sangma Stadium-ko kaduule rikgipa pakmarang gnigipa changna be·gruahani gimin Tura-ni MDC Bernard N Marak baksana dingtang dingtang dolrangba raken jegalgrimtokaha aro iani bidingo ta·raken sandirokaniko dakchina dabiangtokaha.
Ia stadium-ni pakmarang da·o gnigipa changna be·grutaiahani gimin stadium-ko rikgipa contractor-ni kosako jegalatengon, “PA Sangma Stadium-ko rikgipa company-o ka·dongna man·jawaha maina ia gital rikgipa stadium-ko matchotaoni jasani gisepon da·o gnigipa changna ia stadium-ni pakmarang be·grutaiaha. Ia stadium-ni swimming pool aro basement-oba be·srianirangko nikna man·engaha. Ia stadium-ni pakmarang skanggipa be·ani somoion FIR ka·ahachim indiba police-rang, ia stadium-ko rikgipa company-ni kosako maming ja·kurangko de·jaha aro da·o mikkarang waangani ja·man ia stadium-ni pakmarang gnigipa changna be·grutaiaha. Ia stadium-ni pakmarang iandake be·grusimaiode basakobade ia stadium-ni samba jolo donggipa manderang janggirangkoba gimaatani cholrang donga,” ine Tura-ni MDC aro BJP-ni state vice president Bernard N Marak parakataha.
Mikkarang waani somoirangode manderang kenchipchipenba tuna cha·narangan man·piljaenga ine janapatskaengon, ma·mongo gital sorkariko rikahaon ua iani bidingo ma·mong sorkarina badi ka·e sedoatgen ine Marak parakataha.
“Ia stadium-ni a·arangara gitchakgipa a·arangsa ine nikgenchimoba pakmarangko block-rangchisa rikaha aro iani a·selan pakmarang be·gruaienga. Mikkangchi ia pakmarang be·grujana gita stadium-ni pakmarangko bilakbate rikna nangchongmota,” ine Marak parakataha.
Mikkangchi iandake pakmarangni be·gruaniko champengna gita kamrangko dontongatchenge, iani bidingo ning·tue sandirokchina gitaba Tura MDC dabiangaha.
Ia PA Sangma Stadium-ni pakmarang gnigipa changna be·gruahani gimin East Garo Hills a·jani Junebirth C Marak-ba, ia stadium-ko rikgipa Badri Rai Construction Limited-ni kosako raken jegalaniko parakataha.
“2022 bilsio gital rikenggipa Meghalaya Assembly-ni protchongba agre jredugaahani a·sel aro chu·onga gita bosturangko on·jahani a·sel be·gruaha. Ia Assembly nokko rikgipa company, kamrangko nambate ka·na ku·rachakanirangko on·ani ja·man jadokni gisepon ia Assembly nokni mitam bakrangba be·grutaiaha. Apsan daken Tura-ni PA Sangma Stadium-ba 2023 bilsio mikkarang wachakatani somoion be·aha aro ian ia stadium-ko rikgipa company-o ka·dongna man·gijaniko mesokani ong·aha,” ine Marak parakataha.
PA Sangma Stadium-ni pakmarang skanggipa be·ani ja·man Tura-ni gitcham MP Agatha K Sangma baksana construction company-ni official-rang, ia biapko niangenba inquiry dakchina ge·etaha aro iandakgipa a·selrang ong·taijawaha ine manderangna ku·rachakaniko on·ahachim ineba Marak parakataha.
“Iandake ku·rachakanirangko on·ani ja·manba da·o ia stadium-ni pakmarang be·grutaiaha aro ian ia company-ni kamo gisik nanggijaniko mesokani ong·aha,” ine Williamnagar-ni Junebirth Marak parakataha.
Iandake stadium-ni pakmarang be·grutaitaianiara manderangni tangka paisarangko indin bon·atanisan ong·jaenga indiba manderangni ka·donganikoba gimaatenga ine janapatengon, iandake mongsonggipa project-rangko on·engon, sorkari rakgipa niamrangko on·na nanga aro kamrangko nambate nirok sandina nanga ine Marak dabiangaha.
Indake ong·engon, ia PA Sangma Stadium-ni pakmarang da·o gnigipa changna be·grutaiahani gimin Trinamool Congress (TMC) dolba, ia a·selni bidingo jakgitelgipa bimangchi sandirokatchina sorkario dabiangaha.
“PA Sangma Stadium-ni pakmarang be·gruaniara ia stadium-ko rikanio nirok sandia donggijani aro niksamsoani donggijaniko mesokani ong·a. Chu·onga gita gari park ka·ani biaprang donggija ia stadium-ko gong kror 172 koros ong·pile rikaniara namroro silroroanina bate manderangni tangka paisarangko jakkalsretaniko mesokani gitasa ong·aha,” ine TMC youth wing-ni dilgipa Richard Marak matnangataha.
Ia stadium-ko rikgipa Badri Rai Construction Company baksa bak dongani giminba ua NPP-chi dilenggipa MDA sorkariko matnangataha.
“Badri Rai & Company (BRC) aro MDA sorkarini gisepo jena man·gijagipa bakrimanian a·dokna bang·en noksan ong·ataniko ra·baaha aro uamangni kamrangko bang·en nikna man·aha. PA Sangma Stadium-ni pakmarang changgnina kingking be·gruanian ia stadium-ko rikanio jakkalgipa bosturang aro kamrangni gimin sing·aniko nakatataha,” ine Marak parakataha.
Mikkangchi iandakgipa a·selrang ong·taijana gita a·dokni dingtang dingtang kamrangko ka·anio BRC-na kamrangko on·taina nangja ineba TMC-ni dilgipa dabiangaha.