SHILLONG: Da·al Mongolbar salni bako Lok Sabha election-ni result-rangko parakatna siengahani gimin election-o chegipa dolrang aro candidate-rangko, jinma re·jomanirangko dakanichi so·sojengjeng ong·atanirangko ra·bajachina East Khasi Hills a·jani Deputy Commissioner aro Shillong Parliamentary Constituency-ni Returning Officer SC Sadhu didiattaiaha.
Dingtang dingtang political dolrang, candidate-rang aro gipin dolrang baksa DC office-o tom·e chanchirimangani ja·man, chegipa dolrangni aro candidate-rangni jinma re·jomaniko champengna tik ka·aniko District Administration ra·galatpilahachim ine nikna man·a.
Sombar salo, Shillong-ni counting centre-ko nieani ja·man kobor ra·timgiparangna talataniko on·angengon, vote chananiko tom·tomao matchotatna gita kamrangko ka·somanaha aro ia kamo Election department-san ong·aigija pilak political dolrangba bak ong·enga ine Sadhu parakataha.
“Jinma chee re·jomaniko champengna chinga Section 144 CrPC-ko ra·galpilahaoba gipin niamrangde dongkuengani gimin darangba election-ni result-rangko parakanio so·sojengjeng ong·atanirangko ra·bana man·jawa,” ine East Khasi Hills a·jani Deputy Commissioner aganaha.
Sadhu-ni parakatani gitade, election-ni result-rangko parakatani ja·man jinma re·jomanirangko dakgenchimoba maming so·sojengjeng ong·atanirangko ra·bajana gita pilak political dolrang aro candidate-rangba District Administration-na ku·rachakaniko on·manaha.
Jinma re·jomanio maming so·sojengjeng ong·anirang dongjana gita an·tangtangan simsak nirokchina gitaba political dolrangko didiataha ine Sadhu aganaha.
Election-ni result-rangko parakatani ja·man chegipa dolrangna aro candidate-rangna re·jomna cholko on·engahani gimin Voice of the People’s Party (VPP) kusi ong·aniko parakatahachim.
Jinma chee re·jomanio maming so·sojengjeng ong·atani kamrangko ka·jachina gitaba VPP-ni dilgiparang, a·jani manderangkoba didiatahachim.