TURA: Dingtang dingtang dolrangni dabianio pangchake Meghalaya a·dokni State Reservation Policy (SRP)-ko gital dake nipiltaina a·dok sorkari, Expert Committee-ko songe on·ahani gimin Garo Hills-ni A·chik Holistic Awakening Movement (AHAM)-ba Reservation Policy-ko taridapjachina aro 1972 bilsio Meghalaya a·dokko man·e on·dilanggipa pagitchamrangni tarigipa apsan niamkon ja·rikangchina didie, Expert Committee-na sedoataha.
A·dokni reservation policy-ko Meghalaya a·dokko man·e on·dilchenggipa pagitcham ma·gitchamrangan a·doko songdongenggipa dingtang dingtang jatrangna bak rengsiko tikatna miksonganiosa tarie on·ahani gimin ia policy ba niamko taridapaniara kraani ong·jawa ine AHAM-ni president George Prince Ch Momin, expert committee-na sedoatgipa chittio janapataha.
Ia Reservation Policy-ko mande jelbra jelsuanio pangchake ba biapni kri tarijaha ine janapatengon, Khasi-Jaintia-rang baksa tosusagenchimode ua somoio A·chikrang namen ja·manchakbatani giminsa a·doko mongsonggipa jatgittamna apsan bak rengsiko tikatna gita ia niamko pagitchamrang tariaha ine AHAM parakataha.
“Uni gimin Meghalaya a·doko songdongenggipa dingtang dingtang jatrangni namgnina ia reservation policy-ko taridapjachina aro 1972 bilsio tarigimin niamkon kakket aro bebeo ja·rikchina chinga expert committee-ko didienga,” ine AHAM-ni president, Expert Committee-na sedoatgipa chittio parakataha.