New Delhi: Turani MP aro NPP candidate Agatha Sangma, Congress candidate Saleng Sangmani jako ama cha·aniko ra·chakaha indiba uni chol man·a gita ua Garo Hills-ni manderangna kam ka·angkugen ine ua aganaha.
Koborna aganengon, ‘‘Garo Hills-ni manderangna, uamangni MP ong·e dangdike on·na gita namen mandera·beani ong·a aro indakgipa cholrangko angna on·ahanina anga namen kusi ong·a. Anga ia chang election-o chejahaoba Garo Hills-ni, uandake Meghalaya-ni manderangna angni chol ong·a gita dangdike on·angkugen’’ ineba Agatha Sangma aganaha.
Ua uni party NPP-ko aro una chakgipa sakantiko mittele aganaha. “Anga, Saleng-na nama skaniko on·a aro ua an·chingni manderangko name re·dilgen ine ka·donga,” ua aganaha.
Unomitingo, Shillongo changgittamna MP ong·gipa Congress-ni Vincent H Pala-ba, Lok Sabha election-o uni ama cha·aniko ra·chakaha aro ian manderangni rai ong·a, indiba a·dokni manderangni Congress party-o ka·dongani dimelkuja, maina Congress candidate Saleng A Sangma Tura seat-ko cheaha.
Pala, jean AICC tom·anio dongpana gita Butbao Delhiona re·angenga.
Pala, jean MPCC president-ba ong·enga, ua aganaha je cholrang dongjaoba Congress worker-rang NPP-ko bilake warchakna gita raken kamrangko ka·aha.
“Chinga re·baenggipa assembly poll-rangna namedake tarisogen, maina da·o bilsi brirang dongengkua,” Pala aganaha.
