TURA: Rongjeng Model Degree College-ko rikanirang namjani a·sel ian college-o poraina sienggipa chatro chatrirangna kenchakna nangani ong·enga ine A·chik Holistic Awakening Movement (AHAM) Rongjeng regional unit parakatenba, ia college-ko kulina skangba college-ko name rikpiltaichina a·dok sorkario dabiangaha.
AHAM Rongjeng regional unit-ni president Jaksrik N Sangma-ni parakatani gitade, Rongjeng Model Degree College-ko rikanio kamrang namjani gimin batanggimin bilsirangonin Rongjeng jolo donggipa dingtang dingtang dolrang, ia college-ko name rikpiltaichina dabitokahachim aro ia college-ko name rikpiltaina gita Public Accounts Committee (PAC)-ba ku·rachakanirangko on·ahachim.
Indake ong·genchimoba, ia college-ko name rikpiltaikujani a·sel ian college-o poraina sienggipa chatro chatrirangna kenchakna nangani ong·enga ine AHAM Rongjeng regional unit-ni president parakataha.
“Ia college-ko name rikpilchenggija college-ko kulina Education Minister-ni parakatahani gimin chinga suk ong·ja maina ian college-o poraina sienggipa chatro chatrirangna kenchakna nangani ong·enga. Kamrangkon chu·gimik matchotkujaenga ong·ode maini gimin college-ko kulina sorkari ku·rachakenga? Ia college-na maiba dal·a a·selrang ong·na nanggenchimode sawa daiko ra·gen?” ine AHAM Rongjeng regional unit-ni president sing·doataha.
Rongjeng Model Degree College-ni managing committee, principal, aro kam ka·giparangko songchenggija college-ko kulina tik ka·engani giminba ua a·dok sorkariko sing·doataha.
Rongjeng Model Degree College-ko nokdonggaani aro ia college-ni academic session-ko a·bachengatanikode AHAM jegaljaenga ine janapatskaengon, “College-ko nokdonggana skang aro academic session-ko a·bachengatna skangba chatro chatrirangni naljokgnina ia college-ko name rikpiltaichinasa chinga dabienga,” ine AHAM Rongjeng regional unit-ni president parakataha.
