Boko chiringoniko ro·ong aro an·cheng bikotenganina songni manderang jegala

BOKO: Budbar salo a·gilsak gimikon World Environment Day-ko manitokengon, Assam a·dokni Gohalkona, Lapgaon aro Kompaduli songrango donggipa Boko chiringoniko niam gri ro·ong aro an·cheng bikotengani gimin ritchani ritcha songni manderang, jinma jegalgrimanirangko dakangtokskaaha.
Ia World Environment Day-ni salo, Boko-o donggipa Border Area Development Youth Organisation (BADYO)-ni gita ia Boko chiringoniko niam gri ro·ong aro an·cheng bikotengani gimin jinma jegale re·jomaniko ong·atangan baksana ia jolrango bolrangkoba ge·dilangaha.
Ia jinma jegale re·jomaniko ong·atanio, Boko jolo donggipa Gohalkona, Jongakhuli, Komaduli, Lepgaon aro Katholpara songni manderang bang·en bak ra·angtokaha.
Jinma jegale re·jomaniko dakna skang songni manderang, ia bilsini May 17 tariko Boko chiringo auna re·ange sripe siangna nanggipa Lepgaon songni Uday Sarania-ko gisik ra·e mande ra·pilskaaniko dakangaha aro ia biapo uni janggina jinma bi·chakanikoba dakangaha.
Ia chiringoniko niam gri ro·ong aro an·chengrangko bikotengani a·selsa ia mande janggitangko gimaatna nangaha ine matnangtokengon, ia mandeni nokdangna tangka paisani gita dakchakanirangko on·skachina Assam sorkario dabiangaha.
Ia jinma jegale re·jomaniko ong·atani bidingo BADYC-ni president Jonson Sangma, kobor ra·timgiparangna talataniko on·angengon, ia chiringoniko niam gri ro·ong aro an·cheng bikotengani gimin changni chang SDC, Ranger, DC, DFO, Forest Minister aro gipin official-rangna badi ka·doangahachim indiba da·alonan ia chiringoniko niam gri ro·ong aro an·cheng bikotaniko dontongkujaengani giminsa da·alo jinma jegale re·jomaniko ong·ataha ine parakataha.
“Ia chiringoniko 2023 bilsini January 25 tarik dipet niam gri ro·ong aro an·cheng bikotna a·bachengaha aro untalan ia chiringni chi moila ong·atako man·e jakkalna namsrangjaengaha. Ia chiringoniko da·o manderang auna aro gipin kamrangnaba jakkalna man·jaengaha aro matchu mattemangmangba chirangko ringna namjaengaha,” ine Sangma aganaha.
BADYC president-ni parakatani gitade, ia chiringoniko niam gri ro·ong aro an·cheng bikotengani a·sel manderang chirangkosan jakkalna man·jaengaha ong·ja indiba chiringo donggipa na·tok na·batrangna nangchakean baksana ia biaprango a·arang ruronge manderangna kenchakna nanganiba ong·engahachim.
Boko chiringoniko niam gri ro·ong aro an·cheng bikotengani gimin World Environment Day-ko maniani salo, Gohalkona, Jongakhuli, Komaduli, Lepgaon aro Katholpara songni manderang jinma jegalanirangko dakenga.
Iani bidingo Singra Forest Range Officer Bhargabh Hazarika-o sing·sandiaton, ua iani bidingo sandirokanirangko dakenba nanga gita ja·kurangko de·anggen ine ku·rachakaniko on·ataha.