SHILLONG: Tura Lok Sabha seat-ko uamangni candidate Saleng A Sangma cheahani gimin da·o Congress dol Garo Hills-o bilakbapiltaignok ine Shillong-ni gitcham MP aro Meghalaya Pradesh Congress Committee (MPCC)-ni president Vincent H Pala a·kangataha.
Tura Lok Sabha constituency-o INC-ni candidate Saleng Sangma, 3,83,919 vote-rangko man·e changgittamna Tura-ni MP ong·anggipa Agatha K Sangma-ko 1,55,241 vote-rangchi cheangahachim.
Tura Parliamentary Constituency-ni ning·o donggipa Ampati aro Mahendraganj Assembly constituency-osan NPP-ni candidate Agatha K Sangma, vote-rangko bang·bate man·aiaha aro bangki dam 22 Assembly constituency-rangkode INC-ni candidate Saleng A Sangma chegopangahachim.
Indake ong·engon, da·o Tura Lok Sabha seat-ko Saleng cheahani gimin Garo Hills-o Congress dol bilakbapiltaina man·gnok ine MPCC-ni president a·kangataha.
“Garo Hills-o chinga party-na kam ka·gipa membor-rang bang·batakon gimaatna nangahachim aro dilgiparangba dongjahachim. Indiba da·o Saleng, Tura-ni MP-na seokako man·ahani gimin Garo Hills-o Congress dolna ka·dongani sokbapiltaiaha. Iana anga Garo Hills-ni manderangko mittelpilna ska,” ine Pala aganaha.
Congress dolni dilgiparang da·o Khasi-Jaintia Hills-osan ong·aigija Garo Hills-oba dongahani gimin manderang Congress dolo ka·dongna a·bachengpiltaignok ineba ua aganaha.
Sal 15-ni gisepon Tura-ni gital MP Saleng A Sangma, Gambegre MLA ong·aoniko watna nanggen ine janapatskaengon, Lok Sabha election-o susana gita nomination file ka·na skangan ua MLA ong·aniko wate MP-ni kamko jako ra·aigen ine Saleng ku·rachakmanaha ine MPCC-ni president parakataha.
