TURA: Bilsianti ong·atrongbaenga gitan ia changba North Eastern Hill University (NEHU) Tura Campus-ni Annual Varsity Week-ko re·anggipa May 29 tarikoni June 4 tarikona ong·atangaha aro ia Varsity Week-ko ong·atanio Tura campus-ni ning·o donggipa pilak dam 11 department-rangan bak ra·angtokaha.
Ia Annual Varsity Week-ko NEHU Tura Campus-ni Students’ Welfare Council, university-o poraienggipa chatro chatrirang baksa nangrime ong·ataha aro ia Varsity Week-ko a·bachengatanio cultural program aro dingtang dingtang program-rangko ong·atangaha.
Ia manianiko NEHU Tura Campus-ni Campus Director Prof JU Ahmed a·bachengate on·aha aro uni aganprakanio, ia university-o dingtang dingtang biaprangoni dingtang dingtang jatrang re·bae poraiengani gimin ian namen dingtangmanchagipa university ong·a ine parakangaha.
Ia Varsity Week-ko ong·atanio Dr Y Somi Singh-ni nirokanio dingtang dingtang kal·susaanirang, jekai football, basketball, volleyball, athletics aro jatni kal·susaanirangkoba ong·atangaha aro unbaksana nok ning·o kal·susaanirang, jekai chess, carom aro uandakgipa kal·susaanirangkoba ong·atangaha.
Ia Varsity Week-ko ong·atanio, salgro salaram jolo donggipa dingtang dingtang jatrangni doka dam·ani, chrokani aro dakmesokanirangkoba Dr Sunildor Akoijam-ni dilanichi ong·atangaha.
Unbaksana ia Varsity Week-o Dr Namrata Pathak aro Dr LK Gracy-ni dilanichi, debate, short story writing, poetry writing, essay writing, extempore speech aro quiz competition-rangkoba ong·atangaha.
NEHU Tura Campus-ni Varsity Week-ko June 4 tariko, dingtang dingtang program-rangko ong·atanichi ga·subee matchotataha.
