SHILLONG: Tura-ni gitcham MP aro National People’s Party (NPP)-ni candidate Agatha K Sangma, an·tangni MP ong·engmiting somoio kamrangko name ka·jahani a·selsa ia chango amako man·aha ine dingtang dingtang dolrangni matnanganiko Bristibar salo, a·dokni Cabinet Minister aro NPP-ni dilgipa Rakkam A Sangma jegalataha.
“Tura-ni Lok Sabha MP ong·engmiting somoio ua Garo Hills-ni nanganirangko bang·en Parliament-o ku·rang on·aha indiba Garo Hills-ni manderang ia chango dingtanganiko nangnike MP gitalko seokaha aro iako NPP ra·chakaha,” ine Sangma aganaha.
Meghalaya a·doko NPP-chi dilenggipa MDA sorkarini ong·gija dake sorkariko chalaiani a·selsa Shillong aro Tura Lok Sabha constituency damgnion amchepako man·aha ine agananiko jegalatskaengon, “Tura aro Shillong Lok Sabha constituency damgnion NPP-ni sak 50,000-mangni gita voter-rangsan ia election-o gipin dolrangna pu·onaiahani gimin mikkangchi NPP tang·dopilbataina man·aigen,” ine Sangma parakataha.
“Garo Hills-o mitamrang toromni bidingo aro mitamranga ong·gijagipa video-rangko niksoahani a·sel NPP-na pu·onronggipa voter-rangoni sak 50,000-mangni gitasan ia Lok Sabha election-o gipinrangna pu·onaha indiba manderangni dingtanganiko nangnike seokaniko chinga kusi ong·en ra·chakaia,” ine ua aganaha.
Ia chang Lok Sabha election-o badiaba badiaba dolrang, NPP-ni kosako tol·gipa video-rangko tarie social media-rango watahani a·selba NPP amako man·aha ineba NPP-ni dilgipa a·kangataha.
Sangma-ni parakatani gitade, Shillong-ni gital MP Ricky AJ Syngkon aro Tura-ni gital MP Saleng A Sangma sakgnian bang·bea vote-rangchi chegipa ong·ahani gimin manderangni ka·dongsoanirangko chu·sokatna kamrang bang·gnok.
“Bang·bea vote-rangchi cheaha inon manderangni ka·dongsoanirangba bang·aha aro ia ka·donganiko gital MP-rang chu·sokatna nangengaha. Ru·uta somoirangonin VPP-ni dilgiparang, dingtang dingtang nanganirangna ku·rang on·engachim aro ian uamangna manderangni nangnikanirangko chu·sokate on·na namgipa chol ong·engaha,” ine NPP-ni Cabinet Minister aganaha.
