SHILLONG: Shillong Parliamentary constituency-o Voice of the People’s Party (VPP)-ni cheaniara tangka paisa jakkalsretanirangko champengna ku·rang on·ahani gimin ong·ja ine a·dokni Chief Minister aro National People’s Party (NPP)-ni national president Conrad K Sangma parakataha.
Sangma-ni kobor ra·timgiparangna aganani gitade, tangka paisa jakkalsreta ine matnanganirangko sorkarini gita sandirokanio iandake matnanganiara kakket ong·ja ine ma·sina man·ahachim.
“Sakgipinko jaksi otnade altubea indiba tangka paisa jakkalsreta ine matnangengon pangchakaniba dongna nanga. Tangka paisa jakkalsreta ine skatang potchipaianiara kraani ong·ja. Pilak kamrangko ka·anion chinga man·a dipetde jinmana parake dakna jotton ka·enga,” ine Chief Minister aganaha.
Lok Sabha election-o NPP aro gipin dolrangni amako man·ahani gimin MDA-na kenna nangani ong·engama ine sing·anina aganchakaniko on·angengon, iani bidingo ua MDA-o bakrimenggipa dolrang baksa apsan asonge nipilanggen ine Sangma parakataha.
“Chinga ia term-koba matchoten rikanggen aro kamrangko kim·kime ka·enba manderangna dangdike on·angkugen,” ine ua aganaha.
Lok Sabha election-o amako man·ahani gimin MDA sorkariko wate on·china VPP-ni dabienggipani bidingo aganchakaniko on·angengon, a·dokni manderangsa uamangko Assembly election-o seokaha aro iano pangchakesa uamang sorkariko rikaha ine Sangma parakataha.
Ia Lok Sabha election-ko NPP-ni ama man·aniko ra·chakangengon, “Election ge·antian dingtanggrikaia aro pilak election-rangkon dingtang dingtang ma·sianirangchisa susaa. Election-rangkode an·ching tosusagrikna man·jawa,” ine ua aganaha.
An·tangtangni dakgualanirangko skie ra·enba re·mikkanganian political dolantini daito ong·a ineba Sangma aganaha.
Tura Lok Sabha seat-ko bilsi 46-ni ja·man gimaatna nangahani gimin janapatengon, politics-ode iandakgipa obostarangko nikna man·rongaia aro ian a·dok ge·anti aro constituency damantion ong·aia ine ua aganaha.
Ia chang Lok Sabha election-o NDA-ni tang·onangahani gimin janapatskaengon, NDA-ni tom·aniko a·songni Prime Minister Narendra Modi, Sukrobar salo New Delhi-o ong·atenga aro uaba ia tom·anio bak ra·egen ine Chief Minister parakataha.