Manderangni nangnikaniko chu·sokatanian gital MP-rangni daito: NPP

SHILLONG: Meghalaya a·dokni gital MP sakgni, chong·motan Shillong-ni VPP MP Ricky AJ Syngkon aro Tura-ni Congress MP Saleng A Sangma sakgnian, Opposition-osa asongnasiengani gimin Meghalaya a·dokna namroro silroroaniko ra·bana man·genma man·jawa aganna man·kujaenga ine NPP-ni dilgipa aro a·dokni Cabinet Minister Rakkam A Sangma aganaha.
“Shillong aro Tura-ni MP sakgnian opposition-osa asongna siengani gimin uamang a·dokna namroro silroroaniko ra·bana man·genma man·jawa aganna man·kujaenga. Opposition-o ong·ode neng·nikanirang dongaigen,” ine Rakkam aganaha.
MP sakgnian namroro silroroaniko ra·bana man·jagenchimode uamangko seokgipa apsan manderangan ja·mano uamangko jegalskanaba gnang ineba ua aganaha.
“Shillong MP Ricky Syngkon aro Tura-ni MP Saleng Sangma sakgninan election-o chegipa ong·ahani gimin anga namgipa skanirangko on·na kusi ong·a. Manderangni ka·dongsoenga gita uamang kamrangko chu·sokatgen ine anga chingni nokdangoni aro office-ni gitaba ka·dongenga,” ine NPP-ni dilgipa aganaha.
Ia sakgni MP-ko manderang ka·dongani gnangsa seokaha ine janapatskaengon, “An·ching dilgiparang ong·e iako ma·sina nanga, chong·motan MP ong·e manderangni ka·dongsoanirangko chu·sokatna man·jagenchimode uamangko seokgipa apsan manderangan knalde uamangko jegalskagen. Uni gimin a·dokni dingtang dingtang neng·nikanirangko ra·e New Delhi-ona re·angengon, uamang a·doko songdongenggipa manderangni nangnikanirangko chu·sokatgen ine anga ka·dongenga,” ine Sangma aganaha.
NPP Minister-ni aganani gitade, a·doko songdongenggipa manderang, Inner Line Permit (ILP)-ko ra·gate on·china, Khasi aro Garo ku·sikrangko Eighth Schedule-o chapatchina aro uandakgipa dingtang dingtang nangnikanirang dongani gimin ia nangnikanirangko MP sakgni chu·sokatna nangenga.