RESUBELPARA: North Garo Hills a·jao Bajengdoba Block-ni ning·o donggipa Rongjalanggre Govt LP skul nokko rikgija, ia skul nokko rikna kamko man·gipa contractor, tangka paisarangko oke ra·aha ine A·chik Holistic Awakening Movement (AHAM) Bajengdoba unit matnangataha.
AHAM Bajengdoba unit-ni u·iatani gitade, ia skul nokko rikna gita sorkari, 2022-23 bilsio sanction ka·ahachim indiba ia skul nokko rikna kamko man·gipa contractor, gipin skul nokni photo baksa 2023 bilsini January 16 tariko completion report-ko on·enba tangka paisarangko oke ra·aha.
“Iani bidingo manderangni badi ka·aniko man·e chinga re·anggipa June 6 tariko, ia skul nokona re·ange nion, skul nokko nike chinga aiao inmanaha. Lekkarangode ia skul nokko rika matchotaha ine mesokaha aro ia skul nokko rikna kamko man·gipa contractor Williamnagar-ni Bruselish C Marak, tangka paisarangko oke ra·aha ine chinga ma·sina man·aha. Iani bidingo chinga bakan North Garo Hills-ni official-rangna badi ka·doangaha,” ine AHAM Bajengdoba unit-ni president Kolingwat D Sangma parakataha.
Iani bidingo AHAM Bajengdoba unit-ni dilgiparang, North Garo Hills a·jani Additional Deputy Commissioner (ADC)-na badi ka·doangon ua ia skul nokko rikani bidingo am·sandina gita BDO-ko watatgen ine ku·rachakaniko on·ataha ineba Sangma parakataha.
AHAM Bajengdoba unit-ni parakatani gitade, ia contractor-ni completion report-o skulni principal-an soi ka·ahani gimin uamang skulni principal-ona re·ange sing·sandieskaon, ua completion report-o soi ka·a dongja aro ia report-o soi ka·gipa mohor su·gipa pilakan togigipasa ine skulni principal, uamangna talataniko on·ataha.
“Chingna Education department-ni talatani gitade, skul nok rikani contract-rangko on·ani aro nirokani pilak kamrangkon Shillong-onisa dakenga indide maikai ia skul nokko nichenggija Shillong-ni education official-rang, ia contractor-na tangka paisarangko on·na man·aha? Ia contractor-ni mesokgipa photo-rangara gipin skul nokni noksarangsa ong·achim,” ine AHAM Bajengdoba unit-ni president aganaha.
