A·a nokgiparangni tangka dabie dorkasto on·ako HC bon·chipata

SHILLONG: Rongjeng Mangsang A·dokgre Ramako a·palatanichi chanchisoana batpile gamjinrang nosto ong·ani bidingo tangka-paisani gita dakchakaniko on·china dabie kachario dorkasto on·gipako Meghalaya High Court bon·atchipaha. Dorkasto on·giparang 2019 March 8 tariko East Garo Hills-ni Deputy Commissioner (Revenue)/ District Collector-ni hukum on·gipabako bon·atako nangnikaha.
Dorkasto on·giparang jemangan an·tangtangko Dambo-Rongjeng Land Owners’ Association-ni president aro secretary ine janapaha, rama-sorokrangko tarianichi jemangan neng·nikako man·aha uamangna maming gongsa tangka-paisako dakchakani scheme-ko ra·gatgija ramako a·palbatatna sorkarini miksongani bidingo uamang jera ra·aha.
Da·o dongenggipa rama apchona aro rama paksamtangtangchin uajolo songdonggiparangni nok-jamrang, dokkanrang, ge·a-gapanirang, bari-baganrang donga, uamang uamangni janggi tanganirango uamangni dokkan, bari-bagan aro gipin gipin ge·a-gapanirango pangchake janggi tangtokenga ine uamang aganaha.
Ramako a·palatna rama tariaonin uamangni gam-jinrang nosto ong·gen aro uamangni janggi tanganina neng·nikaniko man·gnok, rama man·anggipa a·a nokgiparangna aro kachario lekka on·giparangna sorkari tangka-paisa on·a gita nangachim, uamang aganaha.
Uamang skango uamangni neng·nikanirangko janape aro tangka dabina 2017 November 24-o lekka on·aha, ukoba knaatgija apsan obosta ong·aienga, uamang aganaha.
Uamang indaken HC-ona re·angaha aro pilak kragipa janapanirangko ra·chakna sandie niahachim.
Sandiani report-ko 2019 March 8-ni order-ko gualani donga ine dakataha jekon PWD-ni a·ako ra·seka aro a·ana uamangni tangka dabiako man·jawa ine dorkasto on·giparangni a·kanganirangko knachakjaha.
Mamlako jera ra·e knaatani bidingo, public ramani feet 35-ni gisepo a·arangko darangba a·kangna aro ra·na bil dongja ine HC jeaha ine HC dorkasto on·gipako bon·chipataha, uamang aganaha.