SHILLONG: Ia bilsini Lok Sabha election-o chu·sokgipa ong·jahani gimin Meghalaya a·doko Bharatiya Janata Party (BJP) aro National People’s Party (NPP)-ni bakrimanio adita meligrikgijaniko nikna gita man·skaengaha.
Ia bilsini Lok Sabha election-o NPP, BJP-ni dakchakanichi susaangahaoba, Shillong aro Tura Lok Sabha seat damgnion amchepako man·aha aro iani a·selan dolgnini gisepo adita meligrikgijanirangba da·o ong·katskaengahachim.
Lok Sabha election-o chu·sokjahaoba NPP-ni dilgiparang, BJP baksa bakrimani bidingo maming nipiltaianirangko dakna nangnikskajaengachim.
Iani bidingo sing·anina aganchakaniko on·angengon, dolgnini gisepo matnanggrikani dongjana gita uamang jakgitele am·sandianirangkosa dakna nangnikenga ine NPP-ni dilgipa aro Meghalaya Democratic Alliance (MDA)-ni ku·wattimgipa Ampareen Lyngdoh aganaha.
NPP-ni dilgiparangde, BJP baksa bakrime dongkuna nangnikengoba NPP-ni onbatgipa gadangode, ia election-o ong·a obostako nikahani gimin BJP baksa bakrimanio adita suk ong·gijanirangko nikna man·skaengahachim.
Apsan daken, ma·mongo BJP-ni dilgiparangba dolgnini gisepo bakrimaniko bon·atna chanchianirangko raken jegalataha.
Iani bidingo talataniko on·angengon, NPP aro BJP-ni gisepo bakrimaniko bon·atna gita ma·mongoni maming ge·etanirangko on·a dongjaha ine a·dokni BJP Minister AL Hek parakataha.
“Mijalosan anga Chief Minister-koba grongaha aro chingni gisepo bakrimaniko nipiltaiani giminde chingni gisepo maming agangrikanirang dongjaha,” ine Hek aganaha.
Ia bilsini Lok Sabha election-o BJP, Meghalaya a·dokni Lok Sabha seat damgnion susagija NPP-na chakpaaniko on·ahachim. Indake ong·genchimoba, BJP baksa bakrimani a·sel a·doko, mongsongbate Garo Hills-o NPP, amako man·skana nangahachim.