Apsan niamkon ja·rikangkuchina GSU didiskaa
TURA: 1972 bilsioni da·alona kingkingan Garorangna 40%, Khasi-Jaintia-rangna 40% aro gipinrangna 20% chamaniko ja·rikbaahaoba A·chikrang, an·tangtangni bak rengsiko chu·gimik man·kujaenga ine State Reservation Policy (SRP)-ko gital dake nipiltaianio, Garorangna 50%-ko chamskachina ba niamo pangchake biap kanganiko bariatchina gita GHADC-ni Rongrong MDC Rinaldo K Sangma, SRP-ni Expert Committee-ko didiataha.
“Meghalaya a·doko songdongenggipa dingtang dingtang jatrangna ia reservation policy-ko tarianichi manderangni janggi tangani gadang, poraiani gadang aro pilak gadangon ra·dona gita dakchakani ong·achim indiba gitcham Reservation Policy-ko ja·rikbaanio da·alonan Garorangde chu·gimik bak rengsiko man·kujaenga aro Khasi-Jaintiarangsa bak rengsiko bang·bate man·enga,” ine Sangma, Expert Committee-na sedoatgipa chittio parakataha.
Sangma-ni parakatani gitade, 2022 bilsio Meghalaya State Government-o kam ka·giparangko Economics & Statistics Directorate-ni gita census ka·anio, Khasi-Jaintiarang sak 35,031 ong·e 61.69 percent ong·enga indiba Garorangde sak 19,874-san ong·e 35 percent-ni gitasan ong·kuenga ine nikna man·ahachim.
State Reservation Policy-o Khasi-Jaintiarangna 40% aro Garorangna 40%-ko kanganiara lekkarangosan ong·aia indiba kakket aro bebeo ja·rikade dongjaenga ine janapatskaengon, indiba bilsirangna A·chikrang, an·tangtangni gimaatna nanggipa bak rengsiko man·pilna gita State Reservation Policy-ko gital dake nipiltaigenchimode Garorangna 50%-ko ba niamo pangchake biap chamaniko bariatskana nangenga ine Rongrong MDC, Expert Committee-ko didiataha.
Indake ong·engon, State Reservation Policy-ko gital dake taritaipiljachina aro 1972 bilsio tarigipa apsan niamkon ja·rikangkuchina Garo Students Union (GSU)-ni president Tengsak G Momin, Expert Committee-ko didiatskaaha.
“Garorangba Meghalaya a·doko songdongenggipa mongsonggipa jatgittamoni jatsa ong·paani giminsa Meghalaya a·dokko man·chengani somoion Garorangba gipinrangna bate ja·manchakjachina aro apsan janggi tangani gadangko man·pachina gita Reservation Policy-o Khasi-Jaintiarangna 40% aro Garorangna 40%-ko pagitchamrangan chame on·ahachim indiba indita bilsirangna ia niamko ja·rikanio Garorang, an·tangtangni bak rengsiko da·onan chu·gimik man·kujaenga. Iandake ia Reservation Policy-ko kakket aro bebeo ja·rikjahani gimin bilsi 52-ni ja·man Meghalaya High Court, ia Reservation Policy-ni Roster System-ko ja·rikchina ge·etaniko on·aha,” ine GSU-ni president Momin, Expert Committee-na sedoatgipa chittio janapataha.
State Reservation Policy-ko gital dake nipiltaigenchim ong·ode uan Khasi-Jaintiarangni dabianikosan knachakani gita ong·aigen ine janapatskaengon, Garorangni bak rengsiko gimaatjana gita 1972 bilsini Reservation Policy-ko dangtapjachina aro apsan niamkon ja·rikangkuenba, Meghalaya High Court-ni ge·etgimin gita ia Reservation Policy-ni Roster System-ko kakket aro bebeo ja·rikangchina GSU-ni president didiataha.