TURA: Re·anggipa antionin mikkarang jime wana a·bachengahani a·sel West Garo Hills a·jani Selsella jolrango ba chi bananichi rama jal·langrang, manderangni nok-jamrang, bagan barirang aro mi a·palrang nosto ka·ako man·tokengahani gimin chi bananichi neng·nikanirangko man·enggipa manderangna pilakni gitan dakchakanirangko on·china Selsella-ni ASWA, FKJGP, GSU aro ADE dolrang, a·dok sorkariko aro District Administration-ko didiataha.
NGO-rangni parakatani gitade, Selsella jolrango chi banani a·sel bagan barirang aro mi a·palrang nosto ka·ako man·e game ge·e cha·giparang noksan ong·na nangtokengahachim aro rama jal·langrangba nosto ka·ako man·e chatro chatrirangba skul-college-rangni re·na man·jae noksan ong·na nangtokengahachim.
“Uni gimin iandake chi bananichi duko ga·akenggipa manderangna ta·raken dakchakanirangko on·china chinga Meghalaya sorkariko aro District Administration-ko mol·molenga. Na·simangni ta·rake dakchakanirangko on·anichi Selsella jolo neng·nikanirangko man·enggipa manderangni dukrangko olgrokatna dakchakani ong·gen,” ine Selsella-ni ASWA, FKJGP, GSU aro ADE dolrang parakataha.
Wachini somoio bilsiantian Selsella jolrango chirang banrongengani gimin dakchakanirangko on·na man·na gita National Disaster Response Force (NDRF)-ko donatchina gitaba ia NGO-rang mol·molataha.
“NDRF-ni sipairangko donatanichi da·o chi banani somoio dakchakanirangko on·nasan ong·aigija mikkangchi iandakgipa a·sel ong·anirangona tarisamsona aro manderangni janggirangko jokatna dakchakani ong·gen,” ine dolbri NGO-rang parakataha.