TURA: East Garo Hills a·jani Dobu jolrango songdongenggipa manderang, bank-ni dingtang dingtang kamrangna Williamnagar ba Rongjeng-onasa re·angna nangtokengani a·sel neng·nikanirangko chagrongna nangtokengani gimin Dobu-o State Bank of India (SBI)-ni gital branch-ko kulichina didie, A·chik Holistic Awakening Movement (AHAM) Dobu regional unit, Tura Regional Business Office (SBI)-ni regional manager-na sedoataha.
AHAM Dobu regional unit-ni parakatani gitade, Dobu jolrangoba da·o mandeni jelbra jelsuani namen tang·doangahani gimin bank-ni kamrangna Williamnagar aro Rongjeng gita dakgipa SBI branch-rangona re·rurana nangenganiara namen neng·beani ong·engaha aro Dobu-oba SBI branch-ko kulina gita nangengaha.
“Dobu jolrango songdongenggipa manderang, mongsongbate be·enni gita cholgri ong·gipa aro butchuma budeparang, bank-ni kamrangna indita chel·bea biaprangona re·na nange neng·nikanirangko chagrongna nangtokenga. Unbaksana Dobu jolrango songdongenggipa manderang, an·tangtangni tangka paisarangko chimongna aro oknasan ong·aigija, dingtang dingtang kamrang jekai loan aro uandakgipa kamrangnaba gipin biaprangonasa re·na nangenga. Uni gimin Dobu-o SBI branch-ko kuligenchimode ian jolo songdongenggipa manderangna bank-ni kamrangko ka·anio altubatgnokchim,” ine AHAM Dobu regional unit-ni dilgiparang parakataha.
Dobu-o SBI branch-ko kulianiara jolni manderangna bank-ni kamrango dakchakanisan ong·aigija ia jolrango bading chiwalani kamrangko tang·doatnaba dakchakani ong·gen ine janapatskaengon, pilakni namgninan Dobu-o SBI-ni gital branch-ko kulie on·na nangenga ine AHAM Dobu regional unit, SBI-ni regional manager-na sedoataha.