SHILLONG: Gambegre Assembly constituency-ni by-election-na National People’s Party (NPP)-ni candidate-ko seokanio uni nokdango aro party-o meligrikgijanirang ong·enga ine jangbingbanganiko NPP-ni national president aro a·dokni Chief Minister Conrad Sangma jegalataha.
Gambegre by-election-na uni jikgipa Mehtab Chandee-ko candidate dake susaatna namnikbattokengani gimin uni nokdango aro party-ni gisepo adita meligrikgijanirang ong·enga inako jegalatengon, iani bidingo da·o dipet uni nokdango aro NPP-oba maming meligrikgijani kattarang dongja ine Sangma talataniko on·angaha.
Koborko man·soani gitade, Conrad Sangma-ni adatang aro a·dokni gitcham minister James K Sangma-ba Gambegre by-election-o NPP-ni tikitchi susana nidingengani gimin mitam dilgiparangni Conrad jikgipa Mehtab Chandee-ko candidate dake seokna nangnikbatengani gimin suk ong·nikjaengachim.
Iandake agananiko jegalatskaengon, adita salrangna skangsan uamang party-ni gita pilak dilgiparang baksa iani bidingo chanchirimaha aro pilakan party-ni tik ka·ani gitan ra·chakna ku·rachaktokaha ine Conrad parakatskaaha.
Da·o dipet uamang Gambegre constituency-ni report-rangkoba ra·engkua ine janapatskaengon, ia by-election-o uamang nokdangni gita aro party-ni gitaba apsan kamrangko ka·angkuaigen ine NPP-ni national president parakataha.
NPP baksa MDA-o bakrimenggipa dolrangni bidingo sing·anina aganchakaniko on·angskaengon, ia nangrimgimin dolo da·o dipet maming neng·nikanirang dongkuja aro uamang MDA-o bakrimenggipa pilak dolrang baksa agangrikmanaha ine a·dokni Chief Minister parakataha.