Saubhagya scheme-ni bidingo donuani dongja, CM

SHILLONG: Saubhagya scheme-ko kam ka·anirango cha·bok-rusianirangna matnange Chief Scretary gitchamna aro sakgipin gitcham official-rangna Lokayukta-ni u·iatani lekkarangko sokatani salsa ja·mano ua mamlani bidingo MDA sorkari maming cha·ue-donue dakani dongja ine Chief Minister Conrad K Sangma aganaha.
Lokayukta pilak niamrangko ja·rikgen aro bon·kamgipa report-rangko sokbajana kingking uamang seng·na nanggen ine ua aganaha.
Inner-line permit (ILP) system-ko ra·gatna aro Eight Schedule-o Khasi aro Garo ku·sikko chapatna dabianirangni bidingo sing·on sorkari ua mamlarangni gimin kam ka·anggen ine ua aganaha.
“Ia minggni donchipenggipa dabianirangni bidingo anga changgipino Prime Minister-ko aro mitam ma·mongni minister-rangko grongo chanchigrikgen,” ua aganaha.
Sangma, ru·utgija salrango New Delhi-o dingtang dingtang ma·mongni minister-rangko grongaha, donchipenggipa pilak project-rangko matchotatgen ine DoNER minister uko ka·dongataha, ua aganaha.
DoNER project-rangna agan-ge·etanirangko ma·sina namen neng·a maina ra·chakani gadangona sokna project mingsako bilsisa atamang nanga, ua DoNER minister-na aganaha, ua aganaha.
Ge·etanirangko nipiltaienga ine minister, Sangma-na aganaha.
Online gita gimik kamrangkon man·gnigipa ‘‘Meghalaya One Portal’’-ko a·doko jakkapgopna aro dingtangmancha URL-ko bi·na chief minister, IT minister-koba grongaha.
Shillong Airport-oni attamo aro walo changgni dake songrena cholko man·a gita sildorengrangko watchina ua Civil Aviation Ministry-ko didiaha, ua aganaha.
Uni ru·utgija salo Union Civil Aviation Minister-ko grongani gimin sing·on, ministry ra·chakode pringo, attamo aro walo dake sildorengrangko watgen ine Sangma  aganaha.
Shillong Airport walo onchongna cholrang donga jeon a·song gimikoni je somaioba bilbaa-bilang dakna man·gen, ua aganaha.
Ua kamko niatna Civil Aviation Minister, Sangma-ko ka·dongataha.
A·dok sorkari Shillong aro Tura-o adasu onchongrangko nambatatna chanchigrikaha.
Baljek Airport-ko a·palbatatnaba mol·molaha aro Shillong aro Tura-ni gisepo sildoreng bilaniko a·bachengatna de·e ra·baanirangko on·aha.
Shillong Airport-ko Robibar-o chipangkuenga, Airport-oni bang·bata salo bilgipa sildorengrang saljatchioni bilchakatangenga, attamo bilna passenger-rangna chol dongja.