SHILLONG: TMC-ni dilgipa aro a·dokni gitcham chief minister Conrad K Sangma-ko man·chape pilaknan Congress dolni do·gako oe donenga ine Robibar salo, Opposition dolni dilgipa aro Congress Parliamentary Party-ni dilgipa Ronnie V Lyngdoh parakataha.
Mukul Sangma aro uni manderangko Congress dolona re·bapilna on·jawaha ine adita salrangna skangsan Tura-ni gital Congress MP Saleng Sangma aganahani gimin Opposition dolko dilgipani aganani baksa namen dingtanggrikaniko mesokaha.
“Chinga darangkoba biming mingtee okamna nangnikjaenga indiba Congress dolde pangnan gimikkon rimchakna kusi ong·aia. Chinga iani saksa ba sakgni dilgiparangkosan okamenga ong·ja indiba na·simang, party-ni miksonganirang gita kamko ka·na nangnikenga ong·ode na·simangna Congress dolni do·gako pangnan oe donaienga,” ine Lyngdoh aganaha.
Mukul Sangma aro uni manderangko Congress dol nokchaktaipilna kusi ong·aigenma ine sing·anina Lyngdoh, ia kattarangko aganaha.
Mukul aro uni manderangko Saleng-ni nokchakjana agangipani bidingo sing·on, “Ukode na·simang MP-osa sing·aiboha maina chinga party-ni gitade iani bidingo chanchirima dongkuja. Congress dolona pilakkon okamenga ine aganon chinga badiaba mandeko ba dilgipako miksonge aganenga ong·ja,” ine Lyngdoh aganaha.
Congress doloni wate katgiparang party-ona re·bapilengama ine sing·skaon, “Da·o dipet chinga iani bidingo chanchirima dongkuja maina adita salrangna skangmangmangsan Lok Sabha election matchotaha aro chinga kamrangko name ka·kujaenga. Somoi ong·ahaon chinga pilak kamrangkon nangani kri ka·anggen,” ine Congress parliamentary party-ni dilgipa aganaha.
Shillong Lok Sabha constituency-o amako man·ahani gimin janapatskaengon, “Congress dolsan ong·aija pilak political dolrangan iandakgipa biteko cha·tote niade dongaia maina manderang pangnan gital dilgipana cholko on·e nina skani donga aro ia chango uamang gital dilgipana cholko on·aha,” ine Lyngdoh parakataha.