WILLIAMNAGAR: East Garo Hills a·jani Williamnagar constituency-ni ning·o donggipa Nengkhra Agalgre songona dolong dongjae da·o gita wachini somoirango songni nokni manderang, re·a doanirango neng·nikanirangko chagrongna nangtokengani gimin ia songona Rongtam chiringko dolong kabate on·china A·chik Holistic Awakening Movement (AHAM) Nengkhra unit aro jolo songdongenggipa manderang, sorkario dabiangaha.
Ia Nengkhra Agalgre songara Williamnagar-oni km 15-mang chel·ao donggipa song ong·a indiba ia songona da·alona kingkingan dolongko rike on·kujaengani a·sel songni nokni manderang, Rongtam chiringko ga·batesa bazar anti cha·na aro pilak kamrangnan re·rurana nangtokkuengachim.
Pangna bilsian wachini somoirangode Rongtam chiring dal·bae, songni manderang bazaar anti cha·na aro dingtang dingtang nanga kamrangna ong·katna man·jae neng·nikanirangko chagrongna nangrongenga ine u·iataha.
“Re·anggipa antirangonin mikkarang dontonggija waengahani a·sel da·oba Rongtam chiring dal·taiengahani gimin chinga cha·ani ringanirangko brena, bi·sarangko skul watna aro pilak nanga kamrangnan ong·katna man·gija dongna nangtaiengaha. Ia songo saoba bilonge sagitik ding·gitikna nangoba chinga maikai indita chi ta·rakao sagipa mandeko de·angna man·gen,” ine AHAM Nengkhra unit-ni president Silchi N Sangma sing·doataha.
Bilsiantian da·o gita wachini somoiode ia songni manderang jagimikna re·a doani cholrang dongjae neng·nikanirangko chagrongna nangrongenga aro iani a·selan skulo poraienggipa bi·sarang, porikkarangkoba sena cholrangko man·rongja ineba AHAM Nengkhra unit-ni president parakataha.
“Ia bilsini March jao chinga chingni MLA Marcuise Marak-na, ia chiringko dolong kabate on·china mol·mole memorandum-koba on·ahachim indiba da·alonan chinga maming aganchakanirangko man·kujaenga,” ine songni saksa Jemel Marak parakataha.