RESUBELPARA: Assam aro Meghalaya a·dokni simarango dakait dake ra·gipa mande sakgittamko North Garo Hills a·jani police-rang rim·na man·aha.
Ia mande sakgittamoni gittamgipako police-rang, Sombar salo rim·na man·aha aro ia mandeko re·anggipa June 18 tariko, manderangoniko tangka aro ma·manti bosturangko dakait dake ra·anina June 19 tariko, Mendipathar Police Station-o FIR ka·ani ja·man police-rang rim·aha.
Police-rangni u·iatani gitade, re·anggipa June 18 tariko, dakait dakgipa mande sakbri, AS-18J-0181 Aprilia Scooty aro AS-18E-7925 Bajaj Pulsar 220-o, manderangko dondipatenba, silchidare mesoke, gong 80,000 tangkarang baksana manderangni lekkarang aro mobile phone-rangko ra·e katahachim.
Ia apsan salni attamon, dakait dakgipa manderangko Assam Goalpara a·jani Krishnai jolo donggipa Beldongpara songni manderang rim·ahachim indiba ia manderang, North Garo Hills a·jani Manikganj samba jolo joke katna man·aha.
Ia manderang an·tangtangni jakkalgipa Pulsar bike-kode ua biapon gale kataha aro ja·mano songni manderang, ia bike-ko Mendipathar police station-na pakwate on·ataha.
Ia a·selni bidingo dakait daka man·gipa manderang, June 19 tariko Mendipathar police station-o FIR ka·aha aro FIR ka·anio pangchake police-rang, Assam-ni samba jolrango donggipa biaprangoniko ia manderangko sandina a·bachengataha.
Dakait dakgipa manderangoni saksa Upper Borgum songni bilsi 33 ong·gipa Sunil Boro-ko police-rang Dhupdhara police station-ni ning·o donggipa biap damsaoniko rim·na man·aha aro ia mande baksana uamangni dakait dakanio jakkalgipa AS-18J-0181 Scooty-koba rim·na man·aha.
Indake ong·genchimoba, dakait dakgipa manderangoni sakgittam, chong·motan Kaltu Rabha, Turti Basumatary aro Sahadev Masumatary-de ua biaponi joke katna man·aha. Ia manderangara gimikan Dudhnoi jolonin ong·achim.
Police-rangni bilakbee ia manderangko sandina a·bachengahani gimin dakait dakgipa manderangoni saksa Buglamari songni Turti Basumatary-de re·anggipa July 1 tariko, semi-automatic pistol aro guli ronggni baksa North Garo Hills a·jani police-rangna bame on·eaha aro uni dilange on·ani ja·mano police-rang, Sahadev Basumatary-koba West Garo Hills a·jani Tikrikilla sambaoniko rim·na man·aha ine North Garo Hills a·jani SP parakataha.
Dakait dakanio jak donggipa gipinrangkoba police-rang rim·na sandikuenga ineba SP parakataha.
