SHILLONG: Gambegre Assembly constituency-ni manderangna dangdike on·na ua nambatgipa dilgipakosa nangnikenga ine Gambegre-ni gitcham MLA aro Tura-ni MP Saleng Sangma parakataha.
Gambegre by-election-na Congress dolni candidate-ko seokani bidingo janapatengon, iani bidingo ua constituency-ni manderang aro dilgiparang baksa agangrikchenggen ine Sangma parakataha.
“Angni kam watani ja·man anga angni manderangna dangdike on·na gita nambatgipa dilgipakosa nangnikenga aro manderangko simsak nirokna changgijagipa mandekode nangnikjaenga,” ine Sangma aganaha.
Gambegre by-election-na NPP-ni gita Chief Minister Conrad Sangma-ni jikgipa Mehtab Chandee-ko susaatna tik ka·ani bidingo sing·on, dilgipako seokanide manderangni skaniosa ong·aia indiba Gambegre constituency-o darangba ugita dake manderangna dangdike on·na man·janaba gnang ine Sangma aganaha.
“Anga Gambegre constituency-ni manderangko da·oba nirok sandiangkugen aro uamangba angna ka·saangkuaigen,” ine Tura-ni gital MP aganaha.
Da·o dipet Gambegre by-election-ko ong·atani bidingo Election Commission parakkujaengoba pilak political dolrangan candidate-rangko sandina aro gipin kamrangko ka·na a·bachengtokengahachim.
Adita salrangna skang ong·atanggipa Lok Sabha election-o Congress dolni candidate Saleng A Sangma, NPP-ni candidate aro Tura-ni gitcham MP Agatha K Sangma-ko lak 1.55-na batgipa vote-rangchi chee gital MP-na seokako man·ahachim aro Saleng-ni MLA ong·aoniko watangani ja·man da·o Gambegre Assembly constituency-na gital MLA-ko seoktaina nangengachim.
