SHILLONG: Bilsiantian Garo Hills-o chi bananirangchi manderang neng·nikanirangko chagrongna nangengoba chi bananirangko champengna maming pangkamgipa ja·ku de·anirang dongjaenga ine Sukrobar salo, Tura-ni gital MP Saleng Sangma, a·dok aro ma·mong sorkarirangko matnangataha.
Iani bidingo kobor ra·timgipa manderang baksa agangrikengon, bilsiantian Garo Hills-ni a·kawe jolrango chirang banenga indiba chi bananirangko champengna gita a·dok sorkari maming ja·kurangko de·jaenga ine Sangma parakataha.
“Chi bananiko champengna gita ma·mong sorkarioniba maming project-rangko ra·gatanirang dongja ine anga an·tangde nikenga. Chi bananirangko champengna gita pangkamgipa cholrangko ra·gatna nangchongmotenga,” ine ua aganaha.
Garo Hills-ni a·kawe jolrango chi bananichi 30,000-mangni gita nokdangrang neng·nikanirangko chagrongna nangtokengani gimin Tura-ni MP, ia kattarangko aganaha.
Indake ong·engon, Garo Hills-o chi banani aro dingtang dingtang kamrangni bidingo ua Parliament-o ku·rangko on·gen ineba Sangma parakataha.
Garo Hills-o bang·bata manderangan game ge·e cha·giparangsa ong·a ine janapatengon, Garo Hills-o da·onan gama ge·ani karkanarang ge·saba dongkuja aro Baljek airport-ko nokdonggaoni da·o baditaba bilsirang ong·pilengahaoba ia airport-ko da·onan chalaina man·chipkujaenga ine Tura MP parakataha.
Rel garirangni gimin janapatskaengon, rel garirangko Garo Hills-ni pilak biaprangona sokatani pal da·onan Garo Hills-ni simaosa donenga ine Sangma aganaha.
“Garo Hills-o an·ching namkala skul aro college-rangba dongkujani gimin chatro chatrirang, gipin a·dok aro gipin a·songrangonasa re·ange poraitokenga,” ine ua aganaha.
Inner Line Permit (ILP) aro Khasi-Garo ku·sikrangko Eighth Schedule-o chapatna dabianirangko chu·sokatkujaengani gimin sing·on, iani bidingo North East MP Forum-ni gita chanchimanaha aro ia dabianirangko chu·sokatna salgro salaramni MP-rang ku·cholsan kam ka·gen ine Tura MP parakataha.
“Iani bidingo anga an·tangba chol man·ode Parliament-o ku·rang on·gen,” ine Sangma aganaha.
