TURA: Garo Hills-o lekka pora aro an·seng baljokani kamrangko namdapatna an·tangko on·kange kam ka·anggipa Tura-ni skanggipa Bishop Rev Fr George Mamalaserry, Sukrobar pringwalni 2:20 bajimango, Tura-ni Holy Cross Hospital-o a·gilsakko watangaha aro uni a·gilsakko watanganichi Catholic Mondolinasan ong·aigija Garo Hills gimiknan dal·bea gimaani ong·aha.
Bilsi 92 ong·gipa Rev Mamalaserry-ko ia bilsini April jao, rang·sitanio neng·nikanirangko man·engani gimin Holy Cross Hospital-ni Intensive Care Unit (ICU)-o done sannaniko on·engachim indiba saaoni nampilna gita man·jae ua Sukrobar pringo a·gilsakko watangaha.
Bishop Mamalaserry, jekon Varkey ineba mingachim, 1932 bilsini April 23 tariko, Kerala a·dokni Kalathoor-o Kurian aro Elizabeth Mamalaserry-ni gittamgipa aro chonbatgipa depante ong·e atchiahachim.
Ua bilsi 4 ong·mitingonin songni skulo poraiaha aro 1950 bilsio poraia matchotenba noktangko wate, Madras-ona re·baenba Madras-Mylapore Diocese-ni ning·o donggipa Poonamallee-ni Sacred Heart Seminary-o poraieaha. Poonamallee-o poraiengmitingo ua salgro salaramni gitcham Shillong-Guwahati Archdiocese-o kamko ka·na baseaha.
Bishop Mamalaserry-ko 1960 bilsini April 24 tariko Madras-Mylapore-ni Archbishop Most Rev Louis Mathias DD, pamong songaha.
Pamong songako man·ani ja·man uko Shillong-Guwahati Archdiocese-o missionary ong·e kamko ka·na watataha aro Shillong-ona sokbaon uko Garo Hills-ona Isolni jokataniko gipatna gita watataha.
Tura-ona ua 1960 bilsini August 14 tariko sokbaon uko Fr Anthony Buccieri SDB-ni dakchakgipa pamong ong·na gita seokenba dingtang dingtang songrangona re·e kamko ka·na gita watataha.
1965 bilsio Bishop Mamalaserry-ko Fr Matthew Elanjipuram-ni dakchakgipa pamong ong·e Baghmara-ona watatskaaha aro uanoni ua 1970 bilsio Dalu-ona apjitatako man·skaaha.
1971 bilsini Bangladesh War-o Bishop Mamalaserry, Parish-o katnapgipa East Pakistan-ni manderangko simsak nirokanio mongsonggipa kamko ka·aha.
1979 bilsini February 8 tariko Fr George Mamalaserry-ko Tura-ni skanggipa Bishop dake Pope John Paul II songe on·aha aro 1979 bilsini March 18 tariko uko salgro salaram gimikni Bishop-rang aro hajal kotok manderangni mikkango Bishop-na to nongaha.
Tura-ni Bishop ong·engmiting somoio Rev Mamalaserry, Garo Hills-o songdongenggipa manderangni namgnina kamrangko ka·aha.
Ua somoio Garo Hills-o lekka pora aro an·seng baljokani kamrango namen ja·manchakkuenga ine nikenba Bishop Mamalaserry, Garo Hills-ni damgittam a·jarango dam 24 Parish Centre-rangko kulidape on·aha aro ia pilak Parish centre-rangon ua skulrangko, dispensary-rangko aro chatro chatrirangna hostel-rangkoba kulie on·aha. Garo Hills gimiko uni kulie on·anggipa dam 57 LP skul, dam 35 ME skul, dam 16 secondary skul, dam 2 higher secondary skul, dam 24 me·chikrangni hostel, aro dam 23 me·asarangni hostel-rang donga.
Garo Hills-o namgipa college-ko nangenga ine nikenba ua Tura-o Don Bosco College-ko kulina 1988 bilsio Salesian-rangko okamataha. Ja·mano uni Episcopal Ministry-o ua Williamnagar-o college-ko kulina gitaba Jesuit-rangko okamatskaaha aro college-na on·gimin a·ao ua higher secondary skul nokkoba rike on·aha.
Garo Hills-o an·seng baljokani kamrangko namdapatna gita ua dingtang dingtang songni parish-rango dam 20 dispensary-rangko aro Tura-o ge 150 palang donggipa Holy Cross Hospital-koba kuliaha.
Bishop ong·e kamko ka·engmiting somoio ua Garo Hills-o sagiparangko nirok sandina gita bang·bea nurse-rangko skie on·na an·tangan tangka paisarangkoba dakchake on·aha.
Garo Hills-o ua General Nursing-na Rino Simonetti Nursing School, Danakgre-o donggipa Montfort Centre, Jengjal-o KGBV aro dingtang dingtang skulrangkoba kulina dakchakaha.
Uni iandakgipa kamrangna Meghalaya sorkari, 2018 bilsio Padma Awards-ko on·aha aro Pa Togan Nengminza Award-koba ia bilsio on·aha.
Meghalaya a·dok gimiko lekka pora, an·seng baljokani aro manderangni janggi tangani gadangko ra·dona kamrangko ka·ahani gimin 2019 bilsio Bishop Mamalaserry-na University of Science & Technology Meghalaya (USTM)-ni gita honorary Doctorate-ko on·aha.
Indake ong·engon, Rev Fr Mamalaserry-na bon·kame mande ra·pilskaani giljako re·baenggipa July-ni 8 tarik attam 1:00 bajio Tura-ni Sacred Heart gilja noko ka·anggen aro uni manggisiko Tura-ni RC Road-o donggipa Cathedral gopramo gope galgen.
