BAGHMARA: South Garo Hills a·jao Balkal Asim-oni Rompa Asim-ona dakanggipa ramani Balkal chiringko kabatgipa RCC dolongko adita salrangna skang mikka jime waani somoio pe·angahani a·sel ia rama gita re·ruraenggipa manderangna, mongsongbate skulrangchi re·enggipa bi·sarangna kenchakna nangani ong·enga ine Rompa Asim songni Greneth M Sangma parakatenba, ia dolongko ta·raken taripile on·china, Baghmara Block-ni Block Development Officer (BDO)-na sedoataha.
Sangma-ni parakatani gitade, ia dolongko MGNREGA scheme-ni ning·o Rompa Asim VEC-ni job card holder-rang rikahachim indiba adita salrangna skang mikkarang jime waangani somoio ia dolongko chi pe·angahani a·sel da·o songni nokni manderang ia dolong gita re·ruraanirango neng·nikanirangko chagrongna nangtokengachim.
“Ia dolongara, Balkal Asim-oni Rompa Asim-ona dakanggipa ramani Balkal chiringko kabatgipa RCC dolong ong·achim indiba da·o ia dolongko chi pe·angahani a·sel songni nokni manderang, mongsongbate skulrangchi re·enggipa bi·sarang namen neng·nikanirangko chagrongna nangtokenga,” ine Sangma parakatenba, jolo songdongenggipa manderangni namgnina ia dolongko ta·raken taripile on·china Baghmara Block-ni BDO-ko didiataha.
