SHILLONG: Shillong songjinmani JN Stadium-ko tarienggipa manderangko kragija dake dokanina aro Bharatiya Nagarik Suraksha Sanhita 2023 (BNSS)-ni dingtang dingtang section-ni ning·o ka·mikkenatanirangko on·ahani gimin Khasi Students Union (KSU) membor-rangni kosako Meghalaya Police, minggni case-rangko segataha aro ia case-rangni bidingo Bristibar salo, KSU-na u·iataniko on·ataha.
Iani bidingo talataniko on·angengon, da·o dipet KSU-ni membor-rangko police-rang rim·a dongkuja indiba Lumdiengjri Police Station-o mokordomako segate, KSU-ni membor-na u·iatahani gimin ua aganchakaniko on·eaha ine a·dokni saksa senior police officer parakataha.
Ia a·selrangni bidingo sandirokanirangko dakroroan baksana KSU-ni membor-rangna u·iatanirangko on·angkugen ineba police officer parakataha.
Ia a·selni bidingo police-rang, video-rangkoba man·a dipet nienga aro sakkirangkoba ra·enga.
KSU-ni ILP checkpoint-ko songe kam ka·giparangni nirokengani gimin sing·on, iandake nirok sandianirangko dakna bil on·gimin department-san man·aiani gimin iani bidingo KSU-na u·iatmanaha ine police officer aganaha.
KSU-ni kamrangara niamni a·palo ong·engani gimin mikrakataniko on·manaha aro mikkangchiba uamang iandake niam gri kamrangko ka·angkua ong·ode police-rang nanga gita ja·kurangko de·e mokordoma ka·na nangao ga·akgen ineba ua aganaha.
Tom·tomaniko rakkiangchina didiatengon, manderangna naljokaniko on·na gita pilak biaprangon nanga gita police dolrangko donataha ine police officer aganaha.
Iandakgipa a·selrangko chagronggenchimode police-rangna u·iatchina gitaba ua a·doko songdongenggipa manderangko didiataha.
Indake ong·engon, ia a·selrangni bidingo da·o dipet uamang police-rangni maming u·iatanirangko man·soa dongkuja ine KSU-ni president Lambokstar Marngar parakatskaaha.
ILP aro MRSSA-ko ra·gatchina dabienggipani bidingo kakketko aganchina gitaba ua a·dok sorkariko didiangaha.
ILP aro MRSSA-ko ra·gate on·ningjaenga ine matnangenba, KSU-ni membor-rang ILP checkpoint-rangko songe, dingtang dingtang biaprango kam ka·enggipa manderangko aro rama gita re·ruraenggipa manderangko sandirokengachim ine nikna man·a.