Ampati: South West Garo Hills-ni Jolgaongre songo Meckenson Ch. Marak-ni depante bilsi 26 ong·gipa Rikrak S Sangma, mongma dokako man·e siangaha. Ia a·sel mongma buring jakko rikna jotton ka·ao ong·aha indake ia a·sel ong·anichi ua jolni manderangna kengni ong·enga.
Mongma mande doke siatani koborko man·e ua jolni bil gnanggiparang a·sel ong·aniko nina biapona re·angaha. Biapona sokon uamang songo wa·ani noktopo mongma dokako man·e sia manggisiko nikaha. A·sel ong·gipa biaponiko sianggipako songni mandrerang de·tomaha ine sandie nikaha.
Sianggipa uni bagano kamko ka·engachim unon ia rasong griani a·sel tanggitik ong·aha. 7 ba 7:30 bajimango jaksa mongmarang song gita re·angaha aro uamangni gama-suanirangko chel·chakna uarangko rikpakatna jotton ka·engachim unon sianggipako mongmarangoni mangsa namkjabee uko dokaha aro indake ua sina kragija somaio siangaha.
