SHILLONG: Songsul noksul ku·monge dongani, ku·cholsan ong·ani aro apsangrik ong·anina State Reservation Policy-ko sualangani bidingo BJP Meghalaya unit aganangaha. Policy-o jedakgipa dingtanganiko ra·bana gimikni gita nisusae nianio pangchakna nanga, daito kam ka·gipa gimikni chanchianiko ra·angna nanga, ine party aganaha.
Party-ni consultative committee jeon party worker-rangoni aro dilgiparangoni apsan ku·cholsan ku·pattigipaoniko ra·chimonge namnike aganpaaniko ra·baha.
“Khasi aro Jaintia-na 40%, Garo-na 40%, gipin ST/ SC-rangna 5% aro general category-na 15%-ko da·o dongenggipa policy-o on·aha. Ia status qouta-ko apsangrik dake on·anikon namnike BJP dol aganangpaaha, jatrangna apsangrike dake on·anio songsalna kakket bichal, chanchapaniko aro apsangrik ong·anio policy-ni dakna nanggipa ong·a, ine committee aganaha.
Chingni namnike agangipako ra·chakchina chinga a·dok sorkariko mol·mola aro principle-rangko ra·angpilchina jean mikkangchina an·chingni reservation policy-ko dilangenga,” ine BJP aganaha.
Apsangrik ong·ani aro apsan ong·e sulani ning·o BJP namnike ra·baaha, da·o dongenggigpa reservation policy ka·donganiko on·a jeon apsangrik ong·e suala aro uamangni mikkangchina dakchakani aro nangchongmotgipa cholrangko jatrang man·angkuna on·gipa ong·a. Status quota-ko rakkiangani apsangrik ong·ani principle-rangko ra·angkugen, ine party aganaha.
Policy-na pangkamgipa framework-ko taridapna on·a skangoni kam ka·bagipao kakketgijani aro apsangrik ong·gijanio nangchakgipa ong·a aro maiba dake ia policy-ko taridapa ong·ode neng·nikaniko aro golmalrangko ong·katatgen, ine BJP aganaha.
BJP dolni parakatani gitade, a·dokni gisepo songsul noksul baksa ku·cholsan ong·na aro nangrime kam ka·anio reservation policy bilakgipa ostro ong·a. Status quota-ni name dake rakkianga, songsalo so·sojengjeng ong·aniko aro golmal ong·aniko champenggen.
Reservation policy-na maiba dal·bea dingtanganio ning·tugipa chanchiani aro nipilanio pangchakna nanga, jeon daiko ra·e jako kam ka·gipa gimik aro gipin nangchongmotgipa consultation-rang baksa agangrikaniko dake nipilaniko dakna nanga, da·o dongenggipa policy-ko name dake rakkianganian simsaksoanina kam ka·angani ong·a, ine BJP dol kan·dike agandapangaha.
