TURA: West Garo Hills-ni Rajabala Higher Secondary School-o niamgri skigiparangko rakkigipani bidingo Sombar salo SMC-ni sakgni memborrang Shillong-o School Education and Literacy (DSEL)-ni Director-na matnange seataha aro Directorate-ni gita chugipa gadango institution-ko Tura, DSEO-ko jak dongpaatgija am·sandianiko dakchina dabiangaha.
SMC membor-rang Rofiot Zamal aro Moslem Uddin-ni gita DSEL-na matnangani lekkako seataha.
Matnangatanio parakatani gitade, iano sakgni candidate-rangoniko tangka krorrangko ra·chimonge cha·a aro July 9 tariko DSEO-ni office-o interview-ko ra·gitikaha. Gipin candidate-rang interview-na okamani lekkako July 8 tariko sokatani mamlako aganaha, bon·kameode uamang interview-o dongja ine mesokaha. Gisiko nangatani, namnikgipa sakgni candidate-mangmangkosan interview ra·aha jeon SMC ua biapo dongpaa.
Sakgni candidate-rangko rakina SMC ja·mano resolution-ko ra·chakaha aro chinga sakgniko man·chape sak 4 memborrangni dongpaanio chingni soi aro namnikaniko ra·angna, chinga dal·e ra·jaha aro sakgni candidate-rangko seokgipako ra·chakna DSEO-ona watataha,” ine matnanggiparang aganaha.
Ua an·tangan Interview Board-ni Chairman ong·e Directorate-na apsanko watataha ine DSEO pangpil aganaha.
July 9 tariko namnikgipa sakgni candidate-rangko niamgri sokaha, bang·a gipin skigiparang aganangaha, tangka cha·anichi niamgri kamo rakkiaha. Sorkari fund-rangoni bang·a tangka paisarangko okangaha aro jakkalsretanina SMC-ni president aro scretary-ko matnangaha.
Iani bidingo chugipa gadango institution-ko am·sandianiko dakchina matnanggipa dabiangaha, President aro Secretary-ni kosako badi ka·an baksa SMC-oba rake ja·ku de·angchina dabiangaha.
