TURA: Ma·mong sorkarini on·atenggipa scheme-rangko manderang man·jaenga ine nikenba, Garo Hills-o ‘Centre Scheme Pass or Fail Campaign’-ko a·bachengataha ine Tura-ni MDC aro BJP Meghalaya-ni state vice president Bernard N Marak parakataha.
Ia campaign-ni bidingo talataniko on·angengon, ian ma·mong sorkarini scheme-rangni bidingo manderangna talataniko on·na miksonge ra·gatenggipa program ong·a aro ma·mong sorkarini ra·gate on·gipa scheme-rangko jako ra·e ka·anio a·dok sorkari chu·sokgipa ong·ama ong·ja uko manderanf ja·mano parakskagen ine Marak parakataha.
“Ma·mong sorkari mikkang niteesa scheme-rangko chamatenga aro tangka paisarangko chu·gimikko on·atjaenga ine manderangko togina jotton ka·enga indiba kakketode political dilgiparangsa ia scheme-rangko an·tangtangni man·gnina ra·enga. Uni giminsa ma·mong sorkarini scheme-rangni bidingo aro manderangna on·gimin bilrangni gimin agan-talatanirangko on·na gita ia ‘Pass or Fail Campaign’-ko a·bachengatenga,” ine BJP-ni state vice president parakataha.
Meghalaya a·doko BJP-ba NPP-chi dilenggipa MDA sorkarini bakan ong·engachim ine nikskana man·a.
“A·songni Prime Minister Narendra Modi, kangal cholgri aro chadamberangna ming 200-na bate scheme-rangko a·bachengate on·aha indiba ia scheme-rangko bang·a songrangon manderang man·tokjaenga. Bye election-na skang chinga Gambegre constituency-oba ma·mong sorkarini scheme-rangni bidingo survey-ko ka·enga aro bang·bata scheme-rangkon ia constituency-o taridapaha ine chinga nikna man·aha. Mitam department-rang matchotgijagipa project-rangna tol·gipa report-rangko ma·mong sorkarina on·ataha. Manderang ma·mong sorkarini indin on·atenggipa, chi, dongchakani nok, paikana, indin sualenggipa merong, hajira, namgipa skulrang, sanna banani cholrang aro dingtang dingtang cholrangko man·tokjaenga,” ine Marak parakataha.
“Ma·mongni scheme-rangko manderangni namgninasa a·songni Prime Minister Narendra Modi on·ataha aro ia scheme-rangko name chu·sokatna gita nirok sandianiara chingni daitoan ong·a,” ineba BJP-ni state vice president parakataha.