A·dokni pilak Block-rangon gital office-rangko rikenga: Mondal
WILLIAMNAGAR: East Garo Hills a·jao donggipa Samanda C&RD Block-ni Block Integrated Development Complex-ko Sombar salo, a·dokni C&RD Minister AT Mondal nokdonggae on·angaha aro ia nokko nokdonggae on·anganio, a·dokni Soil & Water Conservation Minister Marcuise N Marak, East Garo Hills a·jani Deputy Commissioner Vibhor Aggarwal, DRDA-ni Project Director Reuben Ch Momin, Samanda Block-ni BDO Tochri R Sangma, sorkari officer-rang, Nokmarang aro Samanda Block ning·o songdongenggipa manderangba bak ra·angtokaha.
Ia gital office nokko nokdonggae on·anganio a·dokni C&RD Minister, jinmana aganprakangengon, a·doko donggipa C&RD Block-rangna gital office nokrangko rikna gita a·dokni chief minister, tangka paisarangko chame on·aha aro ia Block office-rangoni Samanda C&RD Block-ni gital office-an nokdonggae on·chenggipa office ong·enga ine parakataha.
Ia gital office nokko nokdonggae on·anichi Samanda Block ning·o songdongenggipa manderangna bang·en namgni ong·gnok maina ia gital office-ko rikanichi jolni manderang, ma·mong aro a·dok sorkarini on·enggipa scheme-rangko nambate ra·na man·gnok ineba ua aganaha.
Dingtang dingtang C&RD Block-ni ning·o songdongenggipa songni manderangna sorkarini on·enggipa dingtang dingtang scheme aro project-rangni giminba Mondal ia tom·anio agan-talate on·angaha.
Ia gital office nokko nokdonggae on·angani somoio a·dokni Soil & Water Conservation Minister Marcuise N Marak-ba jinmana aganprakengon, ia salara Samanda C&RD Block-ni ning·o donggipa manderangna gisik ra·beani sal ong·gen aro ia block-ni ning·o donggipa manderang da·ode sorkarini on·enggipa dingtang dingtang scheme aro project-rangko altubate ra·na man·gnok ine parakataha.
Iana skang apsan salon, East Garo Hills a·jani Rongrenggre Government Higher Secondary School kal·chakramo ‘artificial turf’-ko tarina gita a·dokni Soil & Water Conservation Minister aro Williamnagar-ni MLA Marcuise N Marak, pangchakaniko songe on·angaha.
Ia skulni kal·chakramo artificial turf-ko tarina gita pangchakaniko songe on·angan baksana Warimagre Govt LP School-ni gital nokkoba nokdonggae on·angjolaha.
Ia skul nokko District Mineral Fund-ni ning·o gong 73,36,000/- koros ong·e rikahachim.