SHILLONG: Ia bilsini gisepon ong·atna sienggipa Gambegre Assembly constituency-ni by-election-o NPP, Congress aro BJP dolrangde susana gita tarisamsotokengahaoba da·onan ia by-election-o susagniko Trinamool Congress (TMC)-ni dilgiparang, a·dokni dilgiparangna u·iatskakujaenga.
Iani bidingo sing·anina aganchakaniko on·angengon, Gambegre by-election-o susaaniko ma·mongo TMC-ko dilenggipa manderangsa tik ka·na man·a aro ua an·tangde iani bidingo mamingkoba aganna man·jawa inesa TMC-ni saksa dilgipa aro Meghalaya in-charge Manas Bhunia aganskaaha.
Apsan daken TMC Meghalaya-ni president Charles Pyngrope-ba Gambegre by-election-o susaani bidingo da·o dipet uamang ma·mongo TMC-ko dilenggiparangni maming u·iatanirangko man·soa dongkuja inesa parakataha.
Ma·mongo TMC-ko dilenggiparang u·iatani ja·mansa Gambegre by-election-o susana gita uamang kragipa candidate-ko sandigen ineba Pyngrope aganaha.
Adita salrangna skang ong·atanggipa Lok Sabha election-oba ma·mongo TMC-ko dilenggiparang, a·dokni dilgiparangna maming u·iatanirangko on·chipjaha aro bon·kamgipa somoiosa TMC dol, Lok Sabha election-o susaatna tik ka·ahachim.
Indake ong·engon, Gambegre by-election-na Congress aro NPP gita dakgipa dolrangde constituency-ni dingtang dingtang biaprango campaign ka·na a·bachengtokskaengaha.
Meghalaya a·doko TMC dol, 2022 bilsiosa ong·katchengahachim aro 2023 bilsini Assembly election-oba seat dambongakosan chena man·aiahachim.
Lok Sabha election-oba TMC, Tura parliamentary constituency-o susaahachim indiba chu·sokgipa ong·na man·jahachim.
